އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކަށް (ޑަބްލިއުޑީސީ) ފުރަތަމަ ފަހަރަށް ރޯދަ އިނާޔަތް ލިބުމުގެ މަގު ފަހިވެގެން ދިޔައީ މި ސަރުކާރުގައެވެ. އަތޮޅުތަކުގެ ރައްޔިތުންގެ ގާތަށް، ރައްޔިތުންގެ ހާލު ބެލުމަށް ރައީސް ޑރ. މުޙައްމަދު މުޢިއްޒު ފެއްޓެވި ދަތުރުފުޅުތަކުގައި ޑަބްލިޔުޑީސީތަކުން ހުށަހަޅަމުން ދިޔަ އެއް ހުށަހެޅުމަކީ އެޔެވެ. އެ ކޮމެޓީތަކަށް ރައީސް ދެއްވަމުން ގެންދެވި ޔަގީންކަމަކީ އެކަން ޤާނޫނީ އިމުގެ ތެރެއަށް ވައްދަވައި އަންހެނުންގެ ކޮމެޓީތަކަށް ރޯދަ އިނާޔަތް ކަށަވަރުކޮށްދެއްވާނެކަމެވެ.

ލާމަރުކަޒީ ޤާނޫނަށް އިސްލާޙް ގެނައުން

18 ފެބްރުއަރީ 2025 ގައި ރައްޔިތުންގެ މަޖިލީހުން ވަނީ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނަށް ގެނެވުނު އިޞްލާޙެއް ފާސްކޮށްފައެވެ. މި އިޞްލާޙުގެ ދަށުން، ޑަބްލިއުޑީސީތަކަށް ކުރިން ދެމުން އައި އެލަވަންސްގެ ބަދަލުގައި ރަސްމީ މުސާރައެއް ލިބޭނެ ގޮތް ހަމަޖެހި، އަދި ރޯދަމަހުގެ އިނާޔަތް ވެސް ލިބޭނެ ގޮތް ވަނީ ހަމަޖެހިފައެވެ. އަދި ޖެހިގެން އައި ދުވަހު ރައީސް ޑރ. މުޙައްމަދު މުޢިއްޒު ވަނީ މި ބިލު ތަޞްދީޤުކުރައްވާފައެވެ.

ރައީސް މި ބިލު ތަސްދީގުކުރެއްވުމުން ޤާނޫނީ ގޮތުން އަންހެނުންގެ ކޮމެޓީތަކަށް ރޯދަ އިނާޔަތް ކަށަވަރުވެގެން ދިޔައީއެވެ. މި ޤާނޫނުގައި ޑަބްލިޔުޑީސީތަކުގެ މެންބަރުންނަށް ރޯދަ މަހުގެ ޢިނާތް ދިނުމުގެ އުސޫލުތައް ހިމަނާފަވެއެވެ. އެގޮތުން، އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ މެންބަރުންގެ ތެރެއިން އެހެން ޤާނޫނެއްގެ ދަށުން ރަމަޟާންމަހުގެ ޢިނާޔަތް ލިބިނުދެވޭ ކޮންމެ މެންބަރަކަށް، ރަމަޟާންމަހުގެ ޢިނާޔަތުގެ ގޮތުގައި ކޮންމެ އަހަރެއްގެ ރަމަޟާން މަސް ފެށުމުގެ ކުރިން 3000.00 (ތިން ހާސް) ރުފިޔާ ދޭން ވާނެ ކަމަށް ބަޔާންކޮށްފަވެއެވެ.

ޑަބްލިޔުޑީސީތަކަށް ފުރަތަމަ ފަހަރަށް ރޯދަ އިނާޔަތް

އަންހެނުން ބާރުވެރިކުރުވާ ސިޔާސީ ގޮތުން ކުރިއަށް ދިއުމުގެ މަގު ފަހިކޮށް ދިނުމުގެ މަގުސަދު ގައި އަންހެނުންގެ ތަރައްގީއަށް މަސައްކަތްކުރާ ކޮމެޓީތައް ވުޖޫދުކުރީ 2012 ވަނަ އަހަރު އެވެ. އެހިސާބުން ފެށިގެން ވެސް އެ ކޮމެޓީތަކުގެ މެމްބަރުންނަށް ރޯދަ އިނާޔަތެއް ލިބިދީފަ ނުވެއެވެ.

ނަމަވެސް ރައީސް ޑރ. މުޙައްމަދު މުޢިއްޒުގެ ވަނީ ފުރަތަމަ ފަހަރަށް އަންހެނުންގެ ކޮމެޓީތަކަށް ރޯދަ އިނާޔަތް ލިބޭނެގޮތް ހައްދަވައިދެއްވާ އެ ކޮމެޓީތަކުގެ އަގު ހަގީގީ މާނާގައި ވަޒަން ކުރަށްވާފައެވެ.

މިއާއި އެކު މި ރޯދަ މަސް ފެށިގެން ދިޔައީ އަންހެނުންގެ ކޮމެޓީތަކުގެ މެމްބަރުންނަށް ވެސް ރޯދަ އިނާޔަތް ލިބިދެވިގެންނެވެ.

އަގުވަޒަން ކުރުމުން އިތުރު ހިތްވަރެއް

ރޯދަ އިނާޔަތް ލިބެން ފެށުމަކީ ޑަބްލިޔުޑީސީތަކުގެ މެންބަރުންނަށް ލިބުނު ބޮޑު ހިތްހަމަޖެހުމެކެވެ. އެ ކޮމެޓީތައް ބާރުވެރި ކުރުވަން ސަރުކާރުން މަސައްކަތް ކުރާ ކަމުގެ ހެއްކެކެވެ. އަދި މިކަމަކީ ކޮމެޓީތަކުގެ މެންބަރުންގެ ކަންބޮޑުވުންތައް ސަރުކާރުން އަޑުއަހާ ކަމުގެ ކުލަގަދަ މިސާލެކެވެ.

އަންހެހުންގެ ކޮމެޓީތަކުގެ މެމްބަރުން މިކަން ބަލައިގަނެ، އުފާކޮށް ހިތްވަރުލިބިގެން ތިބިކަމުގެ އެއް މިސާލަކީ ހއ. ދިއްދޫ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ރައީސް އާމިނަތު ނަހުލާ ވިދާޅުވި ބަސްތަކެވެ. އޭނާ ވިދާޅުވެފައިވާ ގޮތުގައި ކޮމެޓީ މެންބަރެއްގެ ގޮތުގައި އޭނާ ހުންނަތާ 12 އަހަރުވީ ވަނީ ވެފައެވެ. ނަމަވެސް މިދިޔަ ދިގު މުއްދަތުގައި ރޯދަ އިނާޔަތް ލިބިފައެއް ނުވެއެވެ. އެއީ ތަފާތުކުރުމެއްކަމަށާއި، ހަމަހަމަކަން ނެތުންކަމަށް އޭނާ ވަނީ ސިފަކުރަށްވާފައެވެ. ނަމަވެސް ރައީސް މުއިއްޒު, އެކަމަށް ސަމާލުކަން ދެއްވާ މައްސަލަ ހައްލު ކޮށްދެއްވާ ރޯދަ އިނާޔަތް ލިބޭނެ އިންތިޒާމު ހަމަޖެހުމަކީ ބޮޑު ހިތްހަމަޖެހުމެއްކަން ނަހުލާދެއްވި ކުރި ވީޑިއޯ މެސެޖުގައި ވިދާޅުވިއެވެ.

"ރައީސުލްޖުމްހޫރިއްޔާ ނިންމެވި އެ ނިންމެވުމަށް އަޅުގަނޑާ، އަދި ކޮމިޓީގެ ހުރިހާ މެންބަރުންގެ ނަމުގައި ޝުކުރު އަދާކުރަން," ނަހުލާ ވިދާޅުވި އެވެ.

މަސައްކަތަށް އާ ޖޯޝަކާއި އާރޯކަމެއް

ބައެއް ޑަބްލިޔުޑީސީތަކުގެ މެމްބަރުން ފާހަގަކުރަށްވާފައިވާ ގޮތުގައި އެ ރައީސްގެ މި ނިންމެވުމަކީ މި ސަރުކާރާއި، ޚުދު ރައީސް އަންހެނުންގެ އަގު ވަޒަންކޮށް، އަންހެނުންނަށް ދެއްވާ ގަދަރު އަންގައިދޭ ކެމެކެވެ. އަދި އެ ކޮމެޓީތަކަށް ރޯދަ އިނާޔަތް ކަށަވަރުކޮށްދެއްވުމީ އެ ކޮމެޓީތަކުގެ ބުންވަރާއި ޚިދުމަތުގެ ޝައުގު އެތައް ގުނައެއް މައްޗަށް ޖެހިގެންދާނެކަމެކެވެ. މަސައްކަތު އައު ޖޯޝެއް އައި ކަމެކެވެ.

ރޯދަ އިނާޔާތާއެކު ޑަބްލިޔުޑީސީތަކުގެ ޝުކުރު ދަނީ ރައީސް މުޢިއްޒަށާއި، ސަރުކާރަށް އޮހެމުންނެވެ. އެ ކޮމެޓީތަކުން ދޭ ޔަގީންކަމަކީ ތަރައްގީއަށް ސަރުކާރުން އެއްލި ވަލުގައި އެ ކޮމެޓީތައް ބާރަށް ހިފައި، ނަތީޖާ ނެރުމުގައި ބައިވެރިވެދޭނެކަމެވެ.