ކުރީގެ ރައީސް އަބްދުﷲ ޔާމީން އަބްދުލްޤައްޔޫމްގެ ވެރިކަމުގައި ކޯޓުތަކަށް އަތްބޭނުމާއި، މަޖިލީހުގެ މިނިވަންކަން ނަގައިލުމާއި، ޚުދު އެމަނިކުފާނު ވައްކަން ކުރެއްވުމުން ރެކި މިހާރު ދައްކަވަމުން ގެންދަވާ ވާހަކަތަކުން އިނގުރައިދޫ ދާއިރާގެ މެންބަރު އަދި ޕީއެންސީގެ ޕާލިމެންޓަރީ ގްރޫޕްގެ ލީޑަރު އިބްރާހިމް ފަލާހް އަޖައިބުވެ އަންތަރީސްވެފައިވާ ކަމަށް ވިދާޅުވެއްޖެއެވެ.

ފަލާހް މިފަދައިން ވިދާޅުވެފައިވަނީ ރޭ އެކްސް ގައި ކުރެއްވި ޕޯސްޓެއްގައެވެ.

މި ޕޯސްޓުގައި ފަލާހް ފާހަގަކުރައްވާފައިވަނީ ރައްޔިތުންގެ މަޖިލީހާއި، ޖުޑިޝަރީއާއި، ކޯޓުތަކާއި އަދި ވައްކަމުގެ ވާހަކަ ޔާމީން ދައްކަވަމުންދާތީ، އެއީ ހަމަ ޔާމީން ދައްކަވާ ވާހަކައެއްތޯ ހިތަށްއަރާ ކަމަށެވެ.

ފަލާހްގެ ޕޯސްޓުގައި އިތުރަށް ބަޔާންކުރައްވާފައިވަނީ 20 ވަނަ މަޖިލިސް ނަމޫނާ މަޖިލީހަކަށްވެފައިވާ ކަމަށާއި، އޭގެ ސަބަބަކީ މިހާރުގެ ސަރުކާރުން މަޖިލީހަށް ނުފޫޒު ނުފޯރުވާތީ ކަމަށެވެ. އަދި 18 ވަނަ މަޖިލީހުގައި ޔާމީންގެ ވެރިކަމުގައި މަޖިލިސް ކޮންޓްރޯލް ކުރަމުންދިޔަ ގޮތް ވެސް ފާހަގަކުރައްވާފައިވެއެވެ.

މީގެއިތުރުން، ފަލާހް ވަނީ ޔާމީންގެ ވެރިކަމުގައި ހިނގާފައިވާ އެކި ކަންކަމާ ގުޅޭގޮތުން ސުވާލުތަކެއް ނަންގަވާފައެވެ. މީގެ ތެރޭގައި ޤައުމަށް އެންމެ ބޮޑު ޚިޔާނާތެއް ވެފައިވަނީ ކާކުތޯ އާއި، އެންމެ އަނިޔާވެރި ވެރިކަމެއް ކުރީ ކާކުތޯ އާއި، ޖުޑިޝަރީއަށް އެންމެ ބޮޑު ނުފޫޒު ފޯރުވީ ކާކުތޯ ފަދަ ސުވާލުތައް ހިމެނެއެވެ. މި ހުރިހާ ސުވާލެއްއްގެ ޖަވާބަކީ ޔާމީން ކަމަށް ފަލާހް ވިދާޅުވެފައިވެއެވެ.