ޔުއޭފާ ޗެންޕިއަންސް ލީގުގައި އިނގިރޭސި ދެކުލަބް ކަމަށްވާ އާރސެނަލް އާއި އެސްޓަން ވިލާ ކުއާޓަރ ފައިނަލަށް ދަތުރުކޮށްފިއެވެ. އެގޮތުން އާރސެނަލް ރައުންޑް އޮފް 16 ގައި ޕީއެސްވީ ބަލިކޮށްފައިވާއިރު، އެސްޓަންވިލާ ކުއާޓަރ ފައިނަލަށް ދަތުރުކޮށްފައިވަނީ ގަދަ 16 ގައި ކްލަބް ބްރޫޖް ބަލިކޮށްގެންނެވެ. އާރސެނަލް ރޭގައި އަމިއްލަ ދަނޑުގައި ޕީއެސްވީ އާއި ކުރިމަތިލީ ފުރަތަމަ ލެގުގައި 7-1 އިން މޮޅުވެ ބޮޑު އެޑްވާންޓޭޖް އަކާއެކުގައެވެ. ރޭގައި އެމިރޭޓްސް ސްޓޭޑިއަމްގައި ކުޅުނު މެޗުގެ ފުރިހަމަ ވަގުތުހަމަވީ 2-2 އިން މެޗު އެއްވަރުވެގެންނެވެ. އެގޮތުން އާރސެނަލްގެ ގޯލުތައް ޒިންޗެންކޯ އާއި ރައިސް ޖަހާދީފައިވާއިރު، ޕީއެސްވީގެ ގޯލުތައް ޖަހާފައިވަނީ ޕެރިޗިޗާއި ޑްރައިއުއޭ އެވެ. ކުއާޓަރ ފައިނަލުގައި އާރސެނަލް ވާދަކުރަން ޖެހޭނީ ރެއާލް މެޑްރިޑާއި ދެކޮޅަށެވެ. މިދެޓީމު މީގެ ކުރިން މިހާތަނަށް ވާދަކޮށްފައިވަނީ އެންމެ ދެފަހަރުއެވެ. އެއީ 2005/06 ވަނަ އަހަރުގެ ޗެންޕިއަންސް ލީގުގެ ގަދަ 16 ގައެވެ. އެގޮތުން މެޑްރިޑުގެ އަމިއްލަ ދަނޑުގައި ކުޅެވުނު މެޗު އޮންރީގެ ގޯލުން 1-0 އިން އާރސެނަލް މޮޅުވެފައިވާއިރު، އާރސެނަލްގެ ދަނޑުގައި ކުޅެވުނު މެޗު ނިމުނީ 0-0 އިންނެވެ.

މެޗުގެ މޮޅުކުޅުންތެރިޔާ އެސަންސިއޯ. ފޮޓޯ: އެސްޓަންވިލާ

މީގެއިތުރުން އެސްޓަންވިލާ ވަނީ ކްލަބް ބްރޫޖް 3-0 އިން ބަލިކޮށް ޖުމްލަ އެގްރިގޭޓް 6-1 އިން ކުރިހޯދައި ކުއާޓަރ ފައިނަލަށް ދަތުރުކޮށްފައެވެ. މިމެޗުގައި އެސަންސިއޯ 2 ގޯލުޖަހާފައިވާއިރު އަނެއް ގޯލުޖަހާފައިވަނީ ހޮލެންޑުގެ މާޓްސެންއެވެ. ކުއާޓަރ ފައިނަލުގައި އެސްޓަންވިލާ ވާދަކުރަންޖެހޭނީ ޕީއެސްޖީ އާއި ދެކޮޅަށެވެ.