އަންނަ މެއި މަހު އިންޑިއާގައި ބޭއްވުމަށް ހަމަޖެހިފައިވާ ސާފް 19 އަހަރުން ދަށުގެ މުބާރާތުގައި ދިވެހިރާއްޖެ ބޫޓާން އަދި ބަންގްލަދޭޝް އާއި އެއް ގްރޫޕެއްގައި ލައްވާލައިފިއެވެ.

މެއި 9 އިން 18 އަށް އިންޑިއާގެ އަރުނާޗަލް ޕްރަދޭޝްގެ ޔޫޕިއާގައި ކުރިއަށްދާ މި މުބާރާތަކީ ސާފް އިން 18، 19 އަދި 20 އަހަރުން ދަށުގެ އުމުރުފުރާތަކަށް ހާއްސަކޮށްގެން ބާއްވާ ހަތްވަނަ މުބާރާތެވެ. މުބާރާތުގެ މެޗުތައް ކުޅޭނީ 15،000 މީހުންގެ ޖާގައިގެ ޔުޕިއާ ގޯލްޑަން ޖޫބިލީ ސްޓޭޑިއަމްގައެވެ.

މުބާރާތުގެ ގްރޫޕް ބީގައި ވާދަކުރާނީ މުބާރާތުގެ ޗެމްޕިއަންކަން ތިން ފަހަރު ހޯދާފައިވާ އިންޑިއާ އާއި، ދެ ފަހަރު ޗެމްޕިއަންކަން ހޯދާފައިވާ ނޭޕާލް އަދި ސްރީ ލަންކާއެވެ. މިއީ އިންޑިއާގައި ސާފްގެ އުމުރުފުރާ މުބާރާތެއް ހޯސްޓްކުރާ ހަތަރުވަނަ ފަހަރެވެ.

ފާއިތުވި އަހަރުތަކުގައި ރާއްޖޭގެ ޓީމުން ވަނީ މިފަދަ މުބާރާތްތަކުގައި ފާހަގަކޮށްލެވޭ ކާމިޔާބީތަކެއް ހޯދާފައެވެ. އެގޮތުން 2019 ވަނަ އަހަރު ނޭޕާލުގައި ބޭއްވުނު ސާފް 18 އަހަރުން ދަށުގެ ޗެމްޕިއަންޝިޕްގައި ރާއްޖެއިން ވަނީ ތިންވަނަ ހޯދާފައެވެ.

ސާފް އިން އެ އަހަރެއްގެ މުބާރާތް ބާއްވާނެ އުމުރުފުރާއެއް ކަނޑައަޅަނީ އޭއެފްސީ ކޮލިފައިންއަށް ވެސް ރިއާޔަތްކޮށް، ޒުވާން ކުޅުންތެރިންނަށް ފުރުސަތު ފަހިކޮށްދިނުމުގެ ގޮތުންނެވެ. މިދިޔަ އަހަރު މިމުބާރާތް ބޭއްވީ 20 އަހަރުން ދަށުގެ އުމުރުފުރާއަށެވެ. މި މުބާރާތް ކުރިޔަށް ގެންދާނީ މިއަހަރުގެ މެއި މަހުގެ 9 އިން 18 އަށެވެ. މިމުބާރާތުގެ އެންމެ ފަހުން ބޭއްވި 2023 ވަނަ އަހަރުގެ ޗެންޕިއަންކަން ހޯދާފައިވަނީ އިންޑިޔާއިންނެވެ.