ޔުއެފާ ޔޫރޮޕާ ލީގުގެ ގަދަ 16 ގެ ދެވަނަ ލެގުގައި ހޮލެންޑުގެ އަލްކްމަރ އަތުން 3-1 އިން މޮޅުވެ، 3-2 ގެ އެގްރިގޭޓް ނަތީޖާއަކުން މުބާރާތުގެ ކުއާޓަރ ފައިނަލަށް ޓޮޓްނަމް ހޮޓްސްޕަރ ދަތުރުކޮށްފިއެވެ.

މި ދެ ޓީމު ބަައްދަލުކުރި ފުރަތަމަ ލެގުގައި 1-0 އިން ޓޮޓްނަމް ބަލިވެފައިވީ ނަމަވެސް، ދެވަނަ ލެގުގައި ރޭ ކުޅުނު މެޗުން މޮޅުވެ މުބާރާތުގެ ކުއާޓަރ ފައިނަލުގެ ޖާގަ އެޓީމަށް ލިބެނީ ފައިދާގޯލުގެ އެގްރިގޭޓުންނެވެ. ލަންޑަނުގެ ޓޮޓްނަމް ހޮޓްސްޕަރ ސްޓޭޑިއަމްގައި ކުޅުނު މެޗުގައި ޓޮޓްނަމްގެ ފުރަތަމަ ލަނޑު ވަނީ 26 ވަނަ މިނެޓުގައި ވިލްސަން އޮޑޮބާޓް ޖަހާފައެވެ. އެއީ ޑޮމިނިކް ސޮލާންކޭ ދިން ބޯޅައަކުން ގޯލުގެ މަތީ ކަނަށް ފޮނުވާލައިގެން ކާމިޔާބުކުރި ލަނޑެކެވެ. ދެވަނަ ހާފުގެ ކުޅުން ފެށުނުތާ ތިން މިނެޓުގައި ސޮން ހިއުންމިންގެ އެސިސްޓަކުން ޖޭމްސް މެޑިސަން ވަނީ އިތުރު ލަނޑެއް ޖަހާފައެވެ.އެހެންނަމަވެސް 63 ވަނަ މިނެޓުގައި އަލްކްމާގެ ޕިއާ ކޫޕްމެއިނާރސް ވަނީ ޓޮޓްނަމްގެ ޑިފެންސަށް ހެދުނު ގޯހެއްގެ ފައިދާ ނަގައި ލަނޑެއް ޖަހާ އެގްރިގޭޓް ނަތީޖާ އެއްވަރުކޮށްފައެވެ. މެޗުގެ 74 ވަނަ މިނެޓުގައި އޮޑޮބާޓް ވަނީ އޭނާގެ ދެވަނަ އަދި ޓީމުގެ ތިންވަނަ ލަނޑު ޖަހައި މެޗު ކަށަވަރުކޮށްފައެވެ.

މި ވަގުތު އިނގިރޭސި ޕްރިމިއާ ލީގުގެ 13 ވަނައިގައި އޮތް ޓޮޓްނަމް، ޔޫރޮޕާ ލީގުގެ ކުއާޓަރ ފައިނަލުގައި ކުޅޭނީ ޖަރުމަނުގެ އެއިންޓްރެކްޓް ފްރެންކްފަޓާ ދެކޮޅަށެވެ. ފްރެންކްފަޓް ވަނީ ނެދަލޭންޑްސްގެ އަޔަކްސް 6-2 ގެ އެގްރިގޭޓް ނަތީޖާއަކުން ބަލިކޮށް ކުއާޓަރ ފައިނަލުގެ ޖާގަ ހޯދާފައެވެ.