ޔުއެފާ ނޭޝަންސް ލީގުގެ ކުއާޓާ ފައިނަލުގައި ކްރޮއޭޝިއާ އާ ދެކޮޅަށް ކުޅޭ މެޗަށް ފްރާންސްގެ ގައުމީ ޓީމުގެ ސްކޮޑަށް އެ ޓީމުގެ ސްޓްރައިކަރު ކީލިއަން އެމްބާޕޭ ހިމަނައިފިއެވެ. މިއީ މިދިޔަ ސެޕްޓެމްބަރު މަހުން ފެށިގެން ގައުމީ ޓީމުގައި އެމްބާޕޭ ބައިވެރިވާ ފުރަތަމަ ފަހަރެވެ.

ފްރާންސްގެ ކޯޗު ޑިޑިއާ ޑިޝޭމްޕް ވަނީ އެމްބާޕޭ އަކީ ޓީމުގެ ކެޕްޓަންކަން އަދިވެސް ދެމިއޮތްކަން ކަށަވަރުކޮށްދީފައެވެ. "އަހަރެން އެމްބާޕޭ އާއި އެކު މަޝްވަރާތައް ކުރިއަށް ގެންގޮސްފިން، އަހަރެން ޔަގީންކަންދެން އެމްބާޕޭ އަކީ އަހަރުމެންގެ ކެޕްޓަން" ޑިޝޭމްޕް ނޫސްވެރިންނަށް މިހެން ބުނެފައިވެއެވެ.

އުމުރުން 26 އަހަރުގެ އެމްބާޕޭ އަކީ ފްރާންސްގެ ގައުމީ ޓީމަށް މިހާތަނަށް 86 މެޗު ކުޅެދީފައިވާ ކުޅުންތެރިއެކެވެ. އޭނާ އެންމެ ފަހުން ކުޅުނީ ރޭ ބޭއްވުނު ޔުއެފާ ޗެމްޕިއަންސް ލީގުގެ މެޗެއްގައި ރެއާލް މެޑްރިޑްގެ ޖާޒީގައި އެތުލެޓިކޯ މެޑްރިޑްއާ ދެކޮޅަށެވެ.

ފްރާންސް އާއި ކްރޮއޭޝިއާ ދެމެދު ކުޅޭ ނޭޝަންސް ލީގުގެ ކުއާޓާ ފައިނަލުގެ ފުރަތަމަ ލެގު ކުޅޭނީ މިއަންނަ ބްރާސްފަތި ދުވަހު ކްރޮއޭޝިއާގައެވެ. އަދި ދެވަނަ ލެގު ކުޅޭނީ މާރޗް 23 ވަނަ ދުވަހު ފްރާންސްގައެވެ.