އިޓާލިއަން ސީރީ އޭގައި ރޭ ކުޅުނު އޭސީމިލާން ކޯމޯ އަތުން 2-1 ގެ ނަތީޖާއަކުން ފަހަތުން އަރައި މޮޅުވެ މޮޅުވެ، ތާވަލުގެ ހަތްވަނައަށް ޖެހިލައި ޗެންޕިއަންސް ލީގުގެ ޖާގައެއް ހޯދުމާއި ގާތަށް ޖެހިލައިފިއެވެ. އިޓާލިއަން ލީގުގައި ޗެންޕިއަންސް ލީގުން ޖާގަލިބޭނީ ތާވަލުގެ އެންމެ މަތީގައި އޮންނަ 4 ޓީމަކަށެވެ.

މިލާނުގެ ސެންސީރޯ ސްޓޭޑިއަމްގައި ކުޅުނު މި މެޗުގައި ކޯމޯގެ ލޫކަސް ޑަ-ކޫނިއާ 33 ވަނަ މިނިޓުގައި ލަނޑެއް ޖަހައި އެ ޓީމަށް ލީދު ނަގައިދީފައިވެއެވެ. ނަމަވެސް މެޗުގެ ދެވަނަ ހާފުގައި މިލާނުގެ ކޯޗު ސާޖިއޯ ކޮންސެއިސާއޯ ގެނައި ބަދަލުތަކާއެކު ޓީމުގެ ކުޅުން ވަރުގަދަވެގެން ދިޔައެވެ. ފޮފާނާ، އެލެކްސް ޖިމިނޭޒް އަދި ޖޮއާއޯ ފީލިކްސް ކުޅެން އެރުމާއެކު މިލާނުގެ ހަމަލާތައް އިތުރަށް ހަރުދަނާވެގެން ދިޔައެވެ.މިލާނުގެ ކްރިސްޓިއަން ޕުލިސިޗް އާއި ތިޖާނީ ރެއިންޑާރސް ގޯލުޖަހައި، މިލާނަށް ފަހަތުން އަރައި މެޗުން 3 ޕޮއިންޓް ހޯދައިދީފައިވެއެވެ.

މެޗުގެ އިތުރު ވަގުތުގައި ކޯމޯގެ ޑޭލޭ އަލީ ކުރި ފައުލަކާ ގުޅިގެން ރަތް ކާޑު ދައްކައި ދަނޑުން ފޮނުވާލެވުނެވެ. ދެ އަހަރެއްހާ ދުވަހުގެ މެދުކެނޑުމަކަށްފަހު ފުރަތަމަ ފަހަރަށް ކުޅުނު މެޗުގައި އޭނާއަށް ކާޑު ދެއްކީ މިލާނުގެ ރުބެން ލޮފްޓަސް ޗީކްއަށް ކުރި ފައުލަކާ ގުޅިގެން ވީޑިއޯ ބެލުމަށްފަހުގައެވެ.ފަހަކަށް އައިސް އިޓާލިއަން ލީގުގައި ނުފެންނަ ވާދަވެރިކަމެއް މިސީޒަނުގައި އިޓާލިއަން ލީގުން ދަނީ ފެންނަމުންނެވެ. އެގޮތުން ސިރީ އޭގައި މިވަގުތު ތާވަލުގެ އެއްވަނައިގައި 61 ޕޮއިންޓާއެކު އިންޓަރ މިލާން އޮތްއިރު، ދެވަނައިގައި 60 ޕޮއިންޓާއެކު އޮތީ ނަޕޮލީއެވެ. އަދި ތިން ވަނައިގައި އެޓަލާންޓާ އޮތީ 58 ޕޮއިންޓާއެކީގައެވެ.