ސުޕްރީމް ކޯޓުގެ ފަނޑިޔާރުކަމަށް ޝަހީދު އައްޔަނުކުރަން މަޖިލީހުން ރުހުން ދީފި
.png&w=3840&q=75)
ސުޕްރީމް ކޯޓުގެ ފަނޑިޔާރުކަމަށް އައްޔަނުކުރުމަށް މަޖިލީހުން ރުހުން ދެއްވި ހުސައިން ޝަހީދު -- ފޮޓޯ
.jpg&w=3840&q=75)
19 މާރިޗު 2025 - 06:53
ހުސްވެފައިވާ ސުޕްރީމް ކޯޓުގެ ފަނޑިޔާރުގެ މަގާމަށް، ހައި ކޯޓުގެ އިސްފަނޑިޔާރުގެ މަގާމުގައި މިވަގުތު ހުންނެވި ހުސައިން ޝަހީދު އައްޔަނުކުރުމަށް މަޖިލީހުން މިއަދު ރުހުން ދީފިއެވެ.
ސުޕްރީމް ކޯޓުގެ ފަނޑިޔާރެއްގެ މަގާމު ހުސްވީ، އެ މަގާމުގައި ކުރިން ހުންނެވި ހުސްނުއްސުއޫދުގެ މައްސަލައެއް ޖުޑީޝަލް ސާވިސް ކޮމިޝަން (ޖޭއެސްސީ)ން ބަލަން ފެށުމާއެކު، އެ މަގާމުން ހުސްނުއްސުއޫދު އަމިއްލަފުޅަށް އިސްތިއުފާ ދެއްވުމާ ގުޅިގެންނެވެ. އެއާއެކު އެ މަގާމަށް ބޭފުޅަކު ހޮވުމަށް ޖޭއެސްސީން ދެ ފަހަރު އިއުލާންކުރިއިރު، އެ މަގާމަށް އައްޔަނުކުރުމަށް ޖޭއެސްސީގެ ފަރާތުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަށް ފޮނުވާފައިވަނީ ޝަހީދުގެ ނަންފުޅެވެ.
އެގޮތުން ޝަހީދުގެ ނަން ރައްޔިތުންގެ މަޖިލީހަށް ފޮނުއްވި މައްސަލަ މަޖިލީހުގެ ޖުޑީޝަރީ ކޮމެޓީން އިއްޔެ ދިރާސާކޮށް ނިންމީ، ޝަހީދަށް ރުހުން ދިނުމަށް ފެންނަ ކަމަށެވެ. އެއާއެކު މުޅި މަޖިލީހުގެ ރުހުން ހޯދުމަށް މިއަދު އެ މައްސަލަ މަޖިލީހުގެ ޖަލްސާގައި ތާވަލުކުރެވުނެވެ.
އެގޮތުން ޖުޑީޝަރީ ކޮމެޓީގެ މުގައްރިރު އަދި މަނަދޫ ދާއިރާގެ މެންބަރު ހުސްނީ މުބާރަކު، މަޖިލީހުގެ ތަޅުމަށް މިއަދު ހުށަހެޅި ކޮމެޓީގެ ރިޕޯޓަށް ވޯޓަށް އެހިއިރު، ވޯޓުގައި ބައިވެރިވެޑައިގެންނެވި 64 މެންބަރުންގެ އިއްތިފާގުން ނިންމެވީ ސުޕްރީމް ކޯޓަށް ޝަހީދު އައްޔަނުކުރަން ފެންނަ ކަމަށެވެ.
ސުޕްރީމް ކޯޓުގެ ފަނޑިޔާރުކަމަށް ޝަހީދު އައްޔަނުކުރައްވާފައިވާއިރު، މިވަގުތު އެ ކޯޓުގެ އިތުރު ދެ ފަނޑިޔާރުން ކަމުގައިވާ ފަނޑިޔާރު ޑރ. އަޒްމިރަލްދާ ޒާހިރާއި ފަނޑިޔާރު މަހާޒް އަލީ ޒާހިރުގެ މައްސަލައެއް ޖޭއެސްސީން ދަނީ ބަލަމުންނެވެ. އެ މައްސަލަތަކާ ގުޅިގެން އެ ދެ ފަނޑިޔާރުން ވަނީ މަގާމުން ސަސްޕެންޑްކޮށްފައެވެ.