އިޓަލީގެ ގަދަ ދެބާރު ކަމަށްވާ އޭސީ މިލާނާއި އިންޓަރ މިޅާން މިހާރު ބޭނުން ކުރަމުންގެންދާ ސަންސީރޯ ސްޓޭޑިއަމް ތަޅާލުމަށްފަހު، ސަންސީރޯ ސްޓޭޑިއަމް ހުރި ސަރަހައްދުން އައު ސްޓޭޑިއަމްއެއް އެޅުމަށް ބިން ގަތުމަށް 197 މިލިއަން ޔޫރޯގެ ހުށަހެޅުމެއް ހުށަހަޅައިފިއެވެ.

ފުޓްބޯލް-އިޓާލިއާ އިން ރިޕޯޓުކުރި ގޮތުގައި، މި މަޝްރޫއަކީ 2018 ވަނަ އަހަރު ފުރަތަމަ ހުށަހެޅުނު މަޝްރޫއެކެވެ. އަދި މިހާރު މިބިމާއިބެހޭ އެންމެހައި މުއާމަލާތްތަށް ނިމުމުގެ މަސައްކަތް ދަނީ ކުރެވެމުންނެވެ. މި މަޝްރޫއުގެ ދަށުން މިހާރު ސަންސީރޯ ސްޓޭޑިއަމްގެ ކާރުޕާކު އޮތް ސަރަހައްދުގައި އައު ސްޓޭޑިއަމްއެއް އެޅުމަށްފަހު މިހާރު ހުރި ސްޓޭޑިއަމް ތަޅާލުމަށް ވަނީ ރޭވިފައެވެ.

މިލާން އަދި އިންޓަރ އިން އެހެން އޮޕްޝަންތައް ވެސް ބަލާފައިވީ ނަމަވެސް، އެންމެ ފަހުން ނިންމާފައިވަނީ އަނބުރާ އެ ކުލަބުތަކުގެ އަސްލު ޕްލޭނަށް ދިއުމަށެވެ. މިހާރު އެ ދެ ކުލަބުން ވަނީ ސަންސީރޯ ސަރަހައްދުގެ ބިން ގަތުމަށް ހުށަހެޅުން ހުށަހަޅާފައެވެ. އަދި މިހާރު އެ ކުލަބުތަކުން ވަނީ ލޯކަލް އޮތޯރިޓީތަކުގެ ހުއްދައަށް މަޑުކުރަމުންނެވެ.

މި މަޝްރޫއު ކުރިއަށް ގެންދިއުމަށްޓަކައި 30 ޖޫން 2025 ގެ ކުރިން ހުއްދަ ލިބި، 31 ޖުލައި 2025 ގެ ކުރިން މުއާމަލާތް ނިންމަން ޖެހޭނެއެވެ. މި މުއްދަތުގެ ތެރޭގައި މިކަން ނުނިމިއްޖެނަމަ މި އެއްބަސްވުން ބާތިލުވާނެއެވެ.