ޔުއެފާ ނޭޝަންސް ލީގުގެ ކުއާޓާ ފައިނަލް ފުރަތަމަ ލެގުގައި ރޭ ކްރޮއޭޝިއާއިން ވޯލްޑް ކަޕް ރަނަރަޕް ފްރާންސް 2-0 ގެ ނަތީޖާއަކުން ބަލިކޮށްފިއެވެ. ކޮރޮއޭޝިއާގެ އަމިއްލަ ދަނޑުގައި ކުޅުނު މި މެޗުގައި ކްރޮއޭޝިއާ އިން ވަނީ މޮޅުކުޅުމެއް ދައްކާފައެވެ.

ރޭގެ މެޗުގައި ފްރާންސްގެ ކެޕްޓަން ކިލިއަން އެމްބާޕޭ ގިނަ ދުވަސްތަކަކަށްފަހު ގައުމީ ޓީމަށް ނިކުތް ނަމަވެސް، އޭނާގެ ފަރާތުން އެންމެ އެދެވޭ ކުޅުމެއް ފެނިފައެއް ނުވެއެވެ. ފްރާންސް އިން ގިނައިރު ބޯޅަ ހިފަހައްޓައިގެން ކުޅުނު ނަމަވެސް، ކްރޮއޭޝިއާގެ ކީޕަރު ލިވަކޮވިޗްގެ މޮޅު ކުޅުމުގެ ސަބަބުން އެ ޓީމަށް ގޯލެއް ނުޖެހުނެވެ.

Ad by Hajj Corporation

މެޗުގެ 8 ވަނަ މިނެޓުގައި ކްރޮއޭޝިއާ އަށް ލިބުނު ޕެނަލްޓީ ކިކް އަންޑްރޭއީ ކްރަމަރިޗް ފޮނުވާލި ނަމަވެސް، ފްރާންސްގެ ކީޕަރު މައިގްނަން ވަނީ އެ ޕެނަލްޓީ ހުއްޓުވާފައެވެ. މެޗުގެ ފުރަތަމަ ލަނޑު ކްރޮއޭޝިއާ އަށް ކާމިޔާބުކޮށްދިނީ 26 ވަނަ މިނެޓުގައި އަންޓޭ ބުޑިމިއަރ އެވެ. އަދި ފުރަތަމަ ހާފުގެ އިތުރު ވަގުތުގައި އިވާން ޕެރިސިޗް ވަނީ އިތުރު ލަނޑެއް ޖަހައި މެޗުގެ ނަތީޖާ 2-0 އަށް ބަދަލުކޮށްފައެވެ.

މި މެޗުގައި ކްރޮއޭޝިއާގެ ޑިފެންޑަރު ޖޮސްކޯ ގްވަޑިއޯލްގެ ހަމަލާތަކާއި އެހެނިހެން ކުޅުންތެރިންގެ ނުރައްކާތެރި ހަމަލާތައް ފާހަގަކޮށްލެވުނެވެ. ނަމަވެސް ފްރާންސްގެ ކީޕަރު މައިގްނަން ވަނީ ގިނަ ހަމަލާތަކެއް ކާމިޔާބުކަމާއެކު ދިފާއުކޮށްފައެވެ.

އަންނަ އާދީއްތަ ދުވަހު ފްރާންސްގެ ދަނޑުގައި ކުޅޭ ދެވަނަ ލެގުގައި ފްރާންސް އަށް މިހާރު ވަނީ ސެމީ ފައިނަލަށް ދިއުމަށް އުނދަގޫ މަސައްކަތްތަކެއް ކުރަން ޖެހިފައެވެ. އެ މެޗުގައި ފްރާންސް އިން މަދުވެގެން 3-0 އަށް މޮޅުވާން ޖެހޭއިރު، ކްރޮއޭޝިއާ އަށް މިހާރު ވަނީ ސެމީ ފައިނަލާފިޔަވަަޅަކާއި ގާތަށް ޖެހިލާފައެވެ.