ނިމުނު އެމްޑީޕީގެ ސަރުކާރުން ކާގިލް ފައިނޭޝަލް ސާވިސް އިންޓަނޭޝަނަލް (ސީއެފްއެސްއައިޓީ) އިން ބަޖެޓް ސަޕޯޓަށް ނެގި 100 މިލިއަން ޑޮލަރު (1.5 ބިލިއަން ރުފިޔާ) ގެ ލޯނު މި ސަރުކާރުން މި މަހު ވަނީ ދައްކާ ޚަލާސްކޮށްފައެވެ. 2022 ވަނަ އަހަރުގައި މި ލޯނު ނެގީ 7.15 އިންޓަރެސްޓު ރޭޓުގަ އެވެ. އޭރުގެ ރޭޓުން ބަލާނަމަ މި ލޯނަށް އިތުރަށް ސަރުކާރުން 26 މިލިއަން ޑޮލަރުގެ އިންޓަރެސްޓާއެކު ދައްކާފައިވެ އެވެ. އެމްޑީޕީގެ ސަރުކާރުން ކާގިލް ފައިނޭންސްގެ އިތުރުން 2022 ގައި ޕްރައިވެޓް ބޭންކްތަކުން ގިނަ ލޯނުތަކެއް ނެގި އެވެ. ޗާޕުކުރި ބިލިއަން ރުފިޔާގެ ބުރައާއިއެކު އެ ބުރަވެސް މިއޮތީ މި ސަރުކާރުގެ ބޮލުގައެވެ. މިވާހަކައިން ހަނދާން އައުކޮށްލުމަކުން މިވާހަކަ ފަށަމާ ހިނގާށެވެ.

މިއަދު ޤައުމު ހަލަބޮލިކޮށް، ޤައުމަށް އިގްތިސޯދީ ގެއްލުން ދިނުމުގައި އެމްޑީޕީން ދެމިތިބިއިރު، 2018 ވަނަ އަހަރު އުފެދުނު އެމްޑީޕީގެ ވެރިކަން 2023 ވަނަ އަހަރު ނިމުނުއިރު، ދިވެހިރާއްޖޭގެ އިގްތިސާދީ ހާލަތު ވަނީ ނުހަނު ދަށު ދަރަޖައަކަށް ސޮއްސާލާފައެވެ. މި މުއްދަތުގެ ތެރޭގައި އެމްޑީޕީ ސަރުކާރުން ކުރި ޒިންމާދާރުކަން ކުޑަ އަދި ދުރު ވިސްނުމެއްނެތް ޢަމަލުތަކުގެ ސަބަބުން، ޤައުމު ވަނީ އިގްތިސާދީ މަޅިއަކަށް މަހާލައި، އަނދަވަޅަކަށް ވައްޓާލާފައެވެ.

ރުފިޔާ ޗާޕުކޮށް، ލޯނުގެ މައްޗަށް ލޯނު

ރާއްޖޭގައި ވޭތުވި 40 އަހަރު ތެރޭގައި ޖުމްލަ 6 ބިލިއަން ރުފިޔާގެ ފައިސާ ޗާޕުކުރިއިރު، ކުރީ ސަރުކާރުން އެކަނިވެސް ފާއިތުވި ފަސް އަހަރު ދުވަހުގެ ތެރޭގައި 8 ބިލިއަން ރުފިޔާ ޗާޕުކޮށްފައިވެއެވެ. މިއީ ޤައުމުގެ އިގްތިސާދަށް ނުހަނު ބޮޑު ގެއްލުމެއް ލިބުނު ކަމެކެވެ. މީގެ އިތުރުން، ލޯނުގެ މައްޗަށް ލޯނު ނަގަމުން ދިޔަ ނަމަވެސް، ޤައުމަށް ވަންނާނެ އާމްދަނީ އިތުރުވާނެ އެއްވެސް އާ ކަމެއް ނުވަތަ އާ ސިޔާސަތެއް ތަޢާރަފްކޮށްފައެއް ނުވެއެވެ.

ނަމަވެސް މިއަދު އެމްޑީޕީން މިކަންކަން ހަނދާންނެއް ކަހަލައެވެ. ނުވަތަ ޔަހޫދީކަމުން އެކަންކަން ފޮރުވައި ރައްޔިތުންނަށް އޮޅުވާލަން އުޅެނީއެވެ.

އައު ސަރުކާރަށް ޖެއްސުންކުރުން

2023 ގެ އިންތިޚާބުން ބަލިވުމާ ގުޅިގެން، އެމްޑީޕީން ވަނީ އައު ސަރުކާރަށް ޖެއްސުންކުރުމުގެ ގޮތުން ބައެއް މުއައްސަސާތަކުގެ މުވައްޒަފުންގެ މުސާރައާއި އިނާޔަތްތައް އަވަސް އަރުވާލައިގެން ބޮޑުކޮށްފައެވެ. މިއީ ދައުލަތުގެ ބަޖެޓަށް އިތުރު ބުރައެއް އަޅުވާލި ކަމެކެވެ.

އިންތިޚާބާ ދިމާކޮށް، މާލިއްޔަތަށް ނުކުޅެދޭނެ ވަރަށް ބަޖެޓުގައި ނެތް މަޝްރޫޢުތައް އިޢުލާންކޮށް، ފަށާކަމަށް ރައްޔިތުންނަށް ދަޅަދެއްކުމަށް ބަޖެޓުން ބޭރުން ޚަރަދުކޮށްފައިވެއެވެ. މިގޮތުން ހައިމާކެއް، ހިލަގޯންޏެއް ފަދަ ތަކެތި މަޝްރޫޢު ފަށާކަމަށް ދައްކަން ރަށްރަށަށް ގެންގޮސްފައިވެއެވެ. މިއީ ރައްޔިތުންނަށް އޮޅުވާލުމަށް ކުރި ކަންކަމެވެ. ކަމަކަށްނުވާގޮތަށް ބޭކާރު އެތައް ޚަރަދެއް ކުރިއެވެ. އެ މަޝްރޫޢުތައް ނުހިނގިނަމަވެސް އެމްޑީޕީގެ ބޮޑުންގެ ޖީބުތައް ފުރާލިއެވެ.

އެންމެ ފަހުން، އައު ސަރުކާރާއި މަސްވެރިންނާ ޖެއްސުމަށް، އެއްވެސް ގޮތަކަށް ދެކޮޅުނުޖެއްސޭނެ މިންވަރަށް މަސް ގަންނަ އަގު ބޮޑުކޮށްފައިވެއެވެ. މިއީވެސް ޤައުމުގެ އިގްތިސާދަށް އިތުރު ބުރައެއް ގެނުވިކަމެކެވެ. މި ސަރުކާރު ވެރިކަމާއި ހަވާލުވިއިރު މަސްވެރިންނަށް 250 މިލިއަނަށްވުރެ ގިނަ ރުފިޔާ ނުދީ އޮތެވެ. މި ސަރުކާރުން ވަނީ މިދިޔަ އަހަރުގެ އޭޕްރިލް އާއި ހަމައަށް އެ ފައިސާ މަސްވެރިންނަށްދީ ޚަލާސްކޮށްފައެވެ.

މިދިޔަ ސަރުކާރުން ރައްޔިތުން ލައްވައި އެކި މަސައްކަތް ކުރުމަށް ފަހު ނުދީ، އެތައް މިލިއަން ރުފިޔާ

މިސަރުކާރުން ވެރިކަމާ ހަވާލުވިއިރު ދަޢުލަތުގެ ދަރަނި 200 ބިލިއަން ރުފިޔާއަށް އަރައެވެ. މީގެތެރޭގައި ދިވެހި ކުންފުނިތަކަށް ދައްކަންޖެހޭ 9 ބިލިއަން ރުފިޔާ ހިމެނެއެވެ. މި ފައިސާގެތެރެއިން ސަރުކާރުގެ ފުރަތަމަ އަހަރުގެތެރޭގައި 6.6 ބިލިއަން ރުފިޔާ ވަނީ ދައްކާފައެވެ.

އެ ބުރަވެސް ވާރުތަވީ މި ސަރުކާރަށެވެ. އެހެންވީމަ އެމްޑީޕީ މަގުމަތީ ހޯބޯލަވަން ސަޅިއެއްނޫނެވެ.

އެމްޑީޕީން ބޭނުންވަނީ ޤައުމު ހަލަބޮލިކޮށް ދުއްތުރާކުރަން

މި ނަންބަރުތަކުން އެކަނިވެސް އެމްޑީޕީ މަޤައުމުގެ މައްޗަށް ވެފައިވާ ބޮޑު ބޭ އިންސާފު ފެނެއެވެ. ރައްޔިތުންގެ މައްޗަށް ކުލުނެއްނެތްކަން އިނގެއެވެ.

މި އަދުވެސް، މި މާތް މައްސަރުގައި ވެސް އެމްޑީޕީން ކުރަމުންދާހާ ކަމަކީ، ޤައުމު ހަލަބޮލިކޮށް، އިގްތިސާދީ ދުއްތުރާ ގައުމަށް ޖެއްސުމެވެ. މަގުތައް ހަލަބޮލިކޮށް، ހަމަނުޖެހުންނަގާލައި، މިތަނަކީ އަމާންތަނެއްނޫންކަން، ހަމަޖެހުން އޮތްތަނެއްނޫންކަން އިންވެސްޓަރުންނަށާއި، ފަތުރުވެރިންނަށް ދެއްކުމަކީ އެމްޑީޕީގެ މިއަދުގެ މަޤްޞަދެވެ. ހަނދާން ނެތްނަމަ ހަނދާން ކުރަންވީ ކަމަކީ ޤައުމަށްވާ ކޮންމެ ގެއްލުމެއްގެ އަސަރު ހުރިހާ އެންމެނަށް ވެސް ކުރާނެކަމެވެ.

އެމްޑީޕީން ރައްޔިތުން ކަރުގައި އެޅުވި އިގްތިސޯދީ މަޅި ބާރުކުރުމުގައި އަވަދިނެތި

އެމްޑީޕީގެ ސަރުކާރުން ވަނީ ޤައުމުގެ އިގްތިސާދު ހަލާކުކޮށްލާފައެވެ. މި ސަރުކާރަށް ވާރުތަވީ ހުސް ދަރަންޏެވެ. ފައިސާނެތް ވަތްގަނޑުތަކެކެވެ. ހުރީ ހުސް ބިލެވެ. ބިލިއަނުންނެވެ. މި ޖަރީމާ ހިންގުމަށްފަހުވެސް މިއަދު ވެސް އެމްޑީޕީން މަސައްކަތް ކުރަމުން ދަނީ ރައްޔިތުންގެ ކަރުގައި އެޅުވި އިގްތިސާދީ މަޅި ބާރުކުރުމަށެވެ. އެ މަޅި ބާރުވެ އިގްތިސާދު ކޮށިއަރައި، ހާސްވާނަމަ އޭގެ ގެއްލުން އޮތީ އެންމެންނަށެވެ. މިއީ އެންމެހާ ރައްޔިތުން ވިސްނާންޖެހޭ ކަމެކެވެ. އެމްޑީޕީގެ މި ޢަމަލުތަކުގެ ނޭދެވޭ އަސަރު ދިވެހި ރައްޔިތުންނަށް އަންނަން އޮތް އެތައް އަހަރަކަށް ކުރާނެކަން ކަށަވަރެވެ.

ބުއްދިވެރި ގޮތަކީ މިއަދުގެ ހީވާގި މާލިމީއަށް ކަންކަން ފަހިކޮށްދީ، އެ މާލިމީގެ އަތްދަށު ފަހުލަވާނުންނަށް މަދަދުދީގެން ކެތްތެރިވެ ތިބުމެވެ. ދަތީގެ ތެރެއިން އެ ނެރޭ ނަތީޖާއިން ފެންނަނީ އުޖާލާ މިސްރާބެކެވެ.