ޗެމްޕިއަންސް ލީގުގެގަދަ 16 ގައި އެތްލެޓިކޯ މެޑްރިޑުގެ ދަނޑުގައި އެތްލެޓިކޯ އާއި ރެއާލް މެޑްރިޑް އާއި ބައްދަލުކުރި މެޗާ ގުޅިގެން އެޓްލެޓިކޯ މެޑްރިޑުން ވަނީ ރެއަލް މެޑްރިޑްގެ 4 ކުޅުންތެރިން ކުޅިވަރުގެ ރޫހާ ޚިލާފު ޢަމަލުތަކާ ގުޅިގެން ޔުއެފާއަށް ރިޕޯޓުކޮށްފައެވެ.

މި މައްސަލައިގައި ހިމެނެނީ މެޓްރޮޕޮލިޓާނޯގައި ކުޅުނު ދެވަނަ ލެގުގައި އަދި އޭގެ ފަހުން ހިނގި ހާދިސާތަކެވެ. މި މެޗު ރެއަލް މެޑްރިޑުން ކާމިޔާބުކުރީ ޕެނަލްޓީ ޖަހައިގެންނެވެ. އެގޮތުން ވިނީޝިއުސް އާއި ގުޅޭ 6 މައްސަލައެއް ހުށަހަޅާފައިވާކަމަށް ރިޕޯރޓްތައް ބުނެއެވެ.

މީގެ އިތުރުން މެޗުނިމިގެން އެންޓޯނިއޯ ރުޑިގަރ ވަނީ އެޓްލެޓިކޯގެ ސަޕޯޓަރުންނާ ދިމާލަށް އިންޒާރުދޭ އިޝާރާތެއް ކޮށްފައިކަމަށާއި އަދި ޑެނީ ސެބާޔޯސް ވަނީ ޕްރޮވޯކް ކުރުމުގެ ގޮތުން އޭނާގެ އަތްދަނޑިތައް ކަނޑާލާ އިޝާރާތް ކޮށްފައިވާ ކަމަށް ބުނެފައިވެއެވެ. އަދި އެމްބާޕޭ ވެސް ވަނީ ކުރިން ޑިއެގޯ ސިމިއޯނީއަށް ސަސްޕެންޝަނެއް ލިބުނު ފަދަ އަމަލެއް ހިންގާފައިވާ ކަމަށް ތުހުމަތުކޮށްފައިވެއެވެ. އެޓްލެޓިކޯއިން އެންމެ ސީރިއަސް އަމަލެއްގެ ގޮތުގައި ފާހަގަކޮށްފައިވަނީ ރުޑިގަރގެ އަމަލެވެ.

އެތްލެޓިކޯ މެޑްރިޑުން މިމައްސަލަ ހުށަހަޅާފައިވަނީ ޗެންޕިއަންސް ލީގުގެ ކުއާޓަރ ފައިނަލުގައި ރެއާލް މެޑްރިޑް އާރސެނަލް އާއި ބައްދަލުކުރަން ހަމަޖެހިފައިވާ ދަނޑިވަޅެއްގައެވެ.