ބަޔާން މިއުނިކްގެ ކުރީގެ ތަރި ފްރޭންކް ރިބެރީ 2013 ވަނަ އަހަރުގެ ބެލޮން ޑީ އޯ އެވޯޑް އޭނާއަށް ނުލިބުނު މައްސަލައާއި ގުޅޭގޮތުން މީޑިޔާގައި ވާހަކަ ދައްކައިފިއެވެ. އެގޮތުން ރިބެރީ ބުނެފައިވަނީ އެއަހަރުގައި އޭނާއަށް ބެލަންޑިއޯ އޭނާއަށް ޙައްޤު ކަމަށާއި ނަމަވެސް އޭނާއަށް ބެލަންޑިއޯ ނުލިބުނީ ކީއްވެކަމެއް އަދިވެސް އޭނާއަށް ނޭނގޭކަމަށެވެ.

2013 ވަނަ އަހަރަކީ ރިބެރީގެ ކެރިއަރުގައި އެންމެ ފޮނި އަހަރުތަކުގެ ތެރެއިން އަހަރެކެވެ. އެ އަހަރު ބަޔާން މިއުނިކް އާއެކު ޗެމްޕިއަންސް ލީގް ކާމިޔާބުކުރި ރިބެރީ ވިދާޅުވެފައިވަނީ އެއީ އޭނާއަށް އިތުރަށް ހޯދޭނެ އެއްވެސް ކާމިޔާބީއެއް ނެތް ފުރިހަމަ އަހަރެއް ކަމަށެވެ.

Ad by Hajj Corporation

" ބެލޮން ޑީ އޯ އަކީ އަބަދުވެސް އިންސާފުވެރިނޫން ނިންމުމެއް. އަދިވެސް އަހަރެން ޖަވާބު ހޯދަމުން މި ދަނީ. ވޯޓުލުން ދެ ހަފްތާއަށް ވުރެ ދިގު މުއްދަތަކަށް ލަސްކުރި ސަބަބު އަހަރެންނަކަށް ނޭނގޭ،" ރިބެރީ ވިދާޅުވިއެވެ.

އެ އަހަރު ބެލޮން ޑީ އޯ ކާމިޔާބުކުރެއްވީ ކްރިސްޓިއާނޯ ރޮނާލްޑޯއެވެ. ނަމަވެސް ރިބެރީ ވިދާޅުވެފައިވަނީ މެސީއާއި ރޮނާލްޑޯ އަބަދުވެސް އޭނާއަށް އިހްތިރާމް ކުރައްވާ ކަމަށާއި އެ ދެ ކުޅުންތެރިންނާ އެއް ހަމައެއްގައި އޭނާ ހުރިކަން އެނގިވަޑައިގަންނަވާ ކަމަށެވެ.

"ތެދުތެދަށްބުނާނަމަ 2013 ވަނަ އަހަރު އެ ދެ ކުޅުންތެރިންނަށް ވުރެ މަތީގައި އަހަރެން ހުރިން،" ރިބެރީ ވިދާޅުވިއެވެ.