ޔުއެފާ ނޭޝަންސް ލީގުގެ ކުއާޓާ ފައިނަލް ދެވަނަ ލެގުގައި ކްރޮއޭޝިއާ ޕެނަލްޓީގައި ބަލިކޮށް، މުބާރާތުގެ ސެމީ ފައިނަލަށް ފްރާންސް ދަތުރުކޮށްފިއެވެ. ޕެރިހުގެ ސްޓޭޑްޑި ފްރާންސްގައި ކުޅުނު މި މެޗުން ފްރާންސް ވަނީ 5-4 ގެ ނަތީޖާއަކުން މޮޅުވެފައެވެ.

މި ދެ ޓީމު ފުރަތަމަ ލެގުގައި ކުޅުނު މެޗުން 2-0 ގެ ނަތީޖާއަކުން ކްރޮއޭޝިއާ މޮޅުވެފައިވާއިރު، ރޭ ކުޅުނު މެޗުން ފްރާންސް ވަނީ ހަމަ މި ނަތީޖާއިން މޮޅުވެފައެވެ. މެޗުގެ ފުރަތަމަ ލަނޑު ކާމިޔާބުކޮށްދިނީ 52 ވަނަ މިނިޓުގައި މައިކަލް އޮލިސޭ އެވެ. މެޗުގެ 80 ވަނަ މިނިޓުގައި އުސްމާން ޑެމްބެލޭ ވަނީ އިތުރު ލަނޑެއް ޖަހާ މެޗުގެ އެގްރިގޭޓް ނަތީޖާ 2-2 އަށް ހަމަހަމަކޮށްފައެވެ.

މެޗުގެ އިތުރު ވަގުތުގައި އެއްވެސް ޓީމަކަށް ލަނޑެއް ނުޖެހުމާއެކު މެޗުގެ ނަތީޖާ ނެރެން ޖެހުނީ ޕެނަލްޓީ ޖަހައިގެންނެވެ. ޕެނަލްޓީ ޝޫޓްއައުޓްގައި ފްރާންސްގެ ގޯލްކީޕަރު މައިކް މައިގްނަން ވަނީ ކްރޮއޭޝިއާގެ ތިން ޕެނަލްޓީ ދިފާއުކޮށް، ޓީމަށް މޮޅުވުން ހޯދައިދިނުމުގައި މުހިންމު ދައުރެއް އަދާކޮށްފައެވެ.

ފްރާންސްގެ ތިއޯ ހަނާންޑޭޒް އާއި ޖޫލްސް ކޫންޑޭ ގެ ޕެނަލްޓީތައް ނާކާމިޔާބުވުމާ ގުޅިގެން އިތުރު ޕެނަލްޓީތަކެއް ޖަހަން ޖެހުނެވެ. ކްރޮއޭޝިއާގެ ޖޮސިޕް ސްޓެނިސިޗް ގެ ހަތްވަނަ ޕެނަލްޓީ މައިގްނަން ދިފާއުކުރުމާއެކު، ޑަޔޮޓް އުޕެމަކާނޯ ވަނީ ފްރާންސަށް މޮޅުވުން ހޯދައިދީފައެވެ.

2021 ވަނަ އަހަރުގެ މުބާރާތުގެ ޗެމްޕިއަންކަން ހޯދާފައިވާ ފްރާންސް މިހާރު ވަނީ މުބާރާތުގެ ސެމީ ފައިނަލަށް ދަތުރުކޮށްފައެވެ. ސެމީ ފައިނަލްގައި ފްރާންސް ވާދަކުރާނީ ސްޕެއިން އާއި ދެކޮޅަަށެވެ. މިދެޓީމު ވާދަކުރާ ސެމީ ފައިނަލް މެޗު ކުޅެވޭނީ ޖޫން 5 ވަނަ ދުވަހުގެ ރޭގަނޑު ރާއްޖެގަޑިން 11:45 ގައި ސްޓަޓްގާޑްގައެވެ.