އެމެރިކާއިން ޔަމަނުގެ ހޫތީންނާ ދެކޮޅަށް  ކުރިއަށްގެންދާ ހަމަލާތަކުގެ މައުލޫމާތު ލީކުވެފައިވާކަމަށް ވައިޓް ހައުސްއިން ބުނެފިއެވެ.

ޔަމަނުގެ ހޫތީންނާ ދެކޮޅަށް ކުރިއަށް ގެންދާ ހަމަލާތަކާ ބެހޭ ގޮތުން ޑިފެންސް ސެކްރެޓަރީ ޕީޓް ހެގްސެތު އާއި ނައިބު ރައީސް ޖޭޑީ ވެންސް އަދި އެހެން އިސް އޮފިޝަލުން މަޝްވަރާ ކުރެއްވި ގްރޫޕް ޗެޓެއްގައި ނޭނގުމެއްގެ ތެރޭގައި ނޫސްވެރިއަކު ހިމެނިފައިވާކަން ވައިޓްހައުސްއިންވަނީ ކަށަވަރުކޮށްދީފައެވެ.

Ad by Hajj Corporation

އެމެރިކާގެ ރައީސް ޑޮނަލްޑް ޓްރަމްޕް މި ހަމަލާތައް އިއުލާނުކުރެއްވީ މާޗްމަހުގެ 15 ވަނަ ދުވަހު ނަމަވެސް ދި އެޓްލާންޓިކް މަޖައްލާގެ އެޑިޓަރ އިން ޗީފް ޖެފްރީ ގޯލްޑްބާގް ވަނީ ހަމަލާތައް ފެށުމުގެ އެތައް ގަޑިއިރެއްކުރިން މި މައުލޫމާތު އޭނާއަށް ލިބިފައިވާކަމަށް ބުނެ ސްކްރީން ޝޮޓްތަކެއްވެސް އާއްމުކޮށްފައެވެ.

މިކަމާ ގުޅިގެން ޓްރަމްޕް ވިދާޅުވެފައިވަނީ އެކަމުގެ އެއްވެސް މައުލޫމާތެއް ނޭނގޭކަމަށެވެ.

މި ހާދިސާއާ ގުޅިގެން ޑިމޮކްރެޓިކް ޕާޓީގެ ސެނެޓަރ ކްރިސް ކޫންސް ވަނީ މައްސަލަ ތަޙުޤީޤުކުރުމަށް ގޮވާލާފައެވެ. އޭނާ ވިދާޅުވި ސަރުކާރުގެ އިސް ބޭފުޅުން ރަސްމީ ޕްލެޓްފޯމްތައް ނޫންތަންތަނުގައި ހަނގުރާމައިގެ ޕްލޭންތަކާ ގުޅޭގޮތުން މަޝްވަރާކޮށްފައިވާނަމަ، އެއީ ސިއްރު މަޢުލޫމާތު ހިއްސާކުރުމުގެ މިންގަނޑުތަކާ ޚިލާފު ކަމެއްކަމަށާއި އަދި މިކަމުގެ ސަބަބުން އެމެރިކާގެ ސިފައިންނަށް ނުރައްކާވެދާނެ ކަމަށެވެ.

ޑިފެންސް ސެކްރެޓަރީ ހެގްސެތު މިކަމާ ގުޅޭގޮތުން ވާހަކަ ދެއްކެވިއިރު ސެކިއުރިޓީ ބްރީޗްވުމުގެ ޒިންމާ އުފުލާފައެއްނުވެއެވެ. އޭގެ ބަދަލުގައި އޭނާ ވަނީ އެ ޗެޓްގައި "ހަނގުރާމައިގެ ޕްލޭނެއްގެ ވާހަކަ ނުދައްކާ" ކަމަށް ވިދާޅުވެފައެވެ.

ނަމަވެސް ޖެފްރީ ގޯލްޑްބާގް ވަނީ ޔަމަނަށް ހަމަލާދިނުމުގައި ހޭދަވާނެ ވަގުތާއި ހަމަލާދިނުމަށް ބޭނުންކުރާ ހަތިޔާރުތައްފަދަ މައުލޫމާތު ގްރޫޕުގައި ހިއްސާކުރިކަމަށް ބުނެފައެވެ.

ޣައްޒާއަށް ޔަހުދީ އިސްރާއީލުން ދެމުންގެންދާ ހަމަލާތަކާ ގުޅިގެން ރަތް ކަނޑުން ދަތުރުކުރާ އުޅަދުތަކަށް ޔަމަނުގެ ހޫތީން އަންނަނީ ހަމަލާދެމުންނެވެ. އެމެރިކާއަކީ ޔަހޫދީން ހިންގާ ގަތުލުއާއްމުގައި އިސްދައުރެއް އަދާކުރާ ގައުމަކަށް ވާއިރު އިސްރާއީލު ދިފާއުކުރުމަށް އެމެރިކާއިން އަންނަނީ ޔަމަނަށް ހަމަލާތައް ދެމުންނެވެ.