މި އަހަރުގެ މިހާތަނަށް 590،000 އަށްވުރެ ގިނަ ފަތުރުވެރިން ރާއްޖެއަށް ޒިޔާރަތްކޮށްފައިވާ ކަމަށް ޓޫރިޒަމް މިނިސްޓްރީން ހާމަކޮށްފިއެވެ.

މިދިޔަ ބުރާސްފަތި ދުވަހު އެ މިނިސްޓްރީން އާންމުކުރި ތަފާސްހިސާބުތަކުން ދައްކާ ގޮތުގައި މިދިޔަ ބުދަ ދުވަހުގެ ނިޔަލަށް ރާއްޖެއަށް ޒިޔާރަތްކޮށްފައިވާ ފަތުރުވެރިންގެ އަދަދު 593،956 އަށް އަރާފައިވެއެވެ.

މި އަދަދަކީ މިދިޔަ ތިން އަހަރުގެ މި މުއްދަތާ އަޅާބަލާއިރު 4 އިންސައްތައިގެ ކުރިއެރުމެކެވެ. މިނިސްޓްރީގެ ހިސާބުތަކުން ދައްކާ ގޮތުގައި މި އަހަރު އެވްރެޖްކޮށް ދުވާލަކު 6،988 ފަތުރުވެރިން ރާއުވެރިން ރާއްޖެއަށް ޒިޔާރަތްކުރެއެވެ.

ފަތުރުވެރިން އެންމެ ގިނައިން ޒިޔާރަތްކޮށްފައިވަނީ ރިޒޯޓުތަކަށެވެ. މުޅި ޖުމްލައިގެ 69 އިންސައްތަ ކަމުގައިވާ 410،024 ފަތުރުވެރިން ޒިޔާރަތްކޮށްފައިވަނީ ރިޒޯޓުތަކަށެވެ. ދެވަނައަށް އެންމެ ގިނައިން ފަތުރުވެރިން ޒިޔާރަތްކޮށްފައިވަނީ ގެސްޓްހައުސްތަކަށެވެ. ޖުމްލަ 151،293 ފަތުރުވެރިން، ނުވަތަ 25.5 އިންސައްތަ ފަތުރުވެރިން ޒިޔާރަތްކޮށްފައިވަނީ ގެސްޓްހައުސްތަކަށެވެ.

މީގެ އިތުރުން، ހޮޓާތަކަށް 17،172 ފަތުރުވެރިންނާއި، ޓޫރިސްޓު އުޅަނދުތަކަށް 14،936 ފަތުރުވެރިން ޒިޔާރަތްކޮށްފައިވެއެވެ.

ރާއްޖޭގައި މިހާރު ޖުމްލަ 1،189 ތަނަކުން ފަތުރުވެރިންނަށް ޚިދުމަތް ފޯރުކޮށްދެއެވެ. މުޅި ރާއްޖޭގައި 63،453 ޓޫރިސްޓު އެނދު ހުރިއިރު، އޭގެ ތެރެއިން 98.9 އިންސައްތަ ހުރީ އޮޕަރޭޝަނަލް ކެޕޭސިޓީގައެވެ. ރާއްޖޭގައި 179 ރިޒޯޓާއި، 838 ގެސްޓްހައުސް ހުރިއިރު، 44 އެއަރލައިނަކުން ރާއްޖެއަށް ސީދާ ދަތުރުތައް އަޅަމުންދާ ކަމަށް މިނިސްޓްރީން ހާމަކޮށްފައިވެއެވެ.