ދުނިޔޭގެ އެންމެ ވާދަވެރި ފުޓްބޯޅަ ލީގު ކަމަށްވާ އިނގިރޭސި ޕްރީމިއަރ ލީގުގެ ތާވަލުގެ އެއްވަނައިގައިވާ ލިވަރޕޫލާއި ރާއްޖޭގެ ސަރުކާރާއި ދެމެދު ރާއްޖެ ޕްރޮމޯޓް ކުރުން ލޯންޗުކުރި މެޗުކަމަށްވާ މާސޭސައިޑް ޑާބީގައި ލިވަރޕޫލް ވަނީ އެވަޓަން އަތުން ހަނިގޮތަކަށް 1-0 އިން މޮޅުވެއްޖެއެވެ. މި މެޗުގެ ހަމައެކަނި ލަނޑު ޖެހީ ޑިއޯގޯ ޖޯޓާއެވެ.

އެންފީލްޑްގައި ކުޅުނު މި މެޗުން މޮޅުވުމާއެކު، ޕްރިމިއާ ލީގުގެ އެއްވަނައިގައި އޮތް ލިވަރޕޫލްގެ ޕޮއިންޓް ގެޕް ވަނީ 12 ޕޮއިންޓަށް އަނބުރާ ރުޖޫއަވެފައެވެ. މިއީ އެވަޓަންގެ ވޭތުވެދިޔަ 10 މެޗުގެ ތެރެއިން ބަލިވި ފުރަތަމަ މެޗެވެ.
ލިވަޕޫލްގެ އެންފީލްޑްގައި ރާއްޖެ ޕްރޮމޯޝަން ކެމްޕޭން ފެށުމުގެ ރަސްމިއްޔާތުގައި ރައީސް ޑރ. މުހައްމަދު މުއިއްޒުގެ އިތުރުން ޓުއަރިޒަމް މިނިސްޓަރ ތޯރިގް އިބްރާހިމް އާއި ކުޅިވަރު މިނިސްޓަރ އަބްދުﷲ ރާފިއު އަދި އެމް.އެމް.ޕީ.އާރް.ސީގެ އެމްޑީ ޝިއުރީވެސް ބައިވެރިވެވަޑައިގެންނެވިއެވެ.

Ad by Hajj Corporation

ޔޫރަޕްގެ އިތުރުން މުޅި ދުނިޔެއަށް ވެސް މި ކެމްޕޭންގެ ސަބަބުން ރާއްޖޭގެ ޓޫރިޒަމް ޕްރޮމޯޓްވާނެއެވެ. ލިވަޕޫލު އެފްސީ، އެވަޓަންއާ ދެކޮޅަށް ރޭ ކުޅުނު މެޗުގައި ވެސް ވަނީ ރާއްޖެ އިޝްތިހާރުކޮށްފައެވެ. ދަނޑުގެ ލެޑް ޕެނަލްތަކުގެ އިތުރުން ލިވަޕޫލްގެ ސޯޝަލްމީޑިއާ ޕްލެޓްފޯމުތަކުގައި ވެސް ރާއްޖެ ޕްރޮމޯޓްކުރިއެވެ.