ފެލޭލާ އަދި އަލް ފައުޒް ރޭގައި ކުޅުނު މެޗުތަކުން މޮޅުވެ އެޓީމުތަކުގެ ގްރޫޕުގެ އެއްވަނައަށް ޖެހިލައި ސެމީގެ ޖާގަ ކަށަވަރުކޮށްފިއެވެ.

ފެލޭލާ ގްރޫޕް 1 ގައި ހިމެނިފައިވާއިރު، މިގްރޫޕްގައި ހިމެނޭ އަނެއް ޓީމުތަކަކީ ވައިޕާރސް އާއި ގަޓް ސިޓީ އާއި ސީއެސް ސްޕޯރޓްސް ގެ އިތުރުން އަލް ފައުޒް ނިއު ޖެނެރޭޝަންއެވެ. މިގްރޫގައި ރޭގައި ފުރަތަމަ ކުޅުނީ ފައުޒް ނިއުޖެނެޜޭޝަން އާއި ފެލޭލާ ސްޕޯރޓްސް ކުލަބެވެ. މިމެޗު 3-1 އިން ކާމިޔާބުކުރީ ފެލޭލާ އެވެ. މިމެޗުގެ ފެލޭލާގެ ގޯލުތައް މާހިލް (މާއްޕެ) އާއި ވިޖުއްކޮގެ އިތުރުން އައްސަދު ކާމިޔާބުކޮށްފައިވާއިރު، ފައުޒް ގެ ހަމައެކަނި ގޯލުޖަހާފައިވަނީ އަހުމަދު ޝުޢޫންއެވެ.

މިގްރޫޕްގައި ވައިޕާރސް އާއި ގަޓް ސިޓީ ވާދަކުރި ފޯރިގަދަ މެޗު ނިމުނީ 2-1 އިން ގަޓްސިޓީ ކުރިހޯދައިގެންނެވެ. ގަޓްސިޓީގެ ގޯލުތައް ރަޔާން ރިޔާޙް އާއި އާދަމް އަހުމަދު ކާމިޔާބުކޮށްފައިވާއިރު، މެޗުގެ ފަހުވަގުތުގައި ވައިޕާރސްގެ އާލަފް ވަނީ އެޓީމަށް ގޯލެއް ޖަހައިދީފައެވެ.

އެލްފޯކަޕްގެ ގްރޫޕް ދޭއްގައި އަލް ފައުޒް ރޭގައި ވާދަކޮށްފައިވަނީ މިއަހަރު އަލަށް މިމުބާރާތުގައި ބައިވެރިވެފައިވާ ޓީމެއްކަމުގައިވާ ރައިޑާރސް އާއި ދެކޮޅަށެވެ. މިމެޗު ފަސޭހަކަމާއެކު 5-0 އިން ފައުޒް ސްޕޯރޓްސް ކުލަބު ވަނީ ކާމިޔާބުކޮށްފައެވެ. މިމެޗުގައި އަލް ފައުޒްގެ ގޯލުތައް ކާމިޔާބުކޮށްދީފައިވަނީ އަލީ ރިޒާ އާއި އަރީޝް އާއި މަހުދީ (މަހޫ) ގެ އިތުރުން އަލްޔާނު އެވެ. މީގެ ތެރެއިން އަރީޝް ދެގޯލު ކާމިޔާބުޮށްފައިވާއިރު، ގިނަ ދުވަސްތަކަކަށްފަހު އެލްފޯ ކަޕުން ފެނިގެންދިޔަ މަހޫގެ ފަރާތުން ވަނީ މޮޅުކުޅުމެއް ފެނިގެން ގޮސްފައެވެ.

މިގްރޫޕްގައި ވެސްޓް ސިޓީ އާއި ޒަލްޒަލާ ވާދަކުރި މެޗުގައި ޒަލްޒަލާގެ ޝަވީލް ގޯލެއް ޖަހައި މެޗުގެ ކުރީކޮޅުގައި ލީޑުނަގާފައިވަނިކޮށް ފަހަތުން އަރައި ދެގޯލު ކާމިޔާބުކޮށް 2-1 އިން ވެސްޓް ސިޓީ ވަނީ ކުރިހޯދާފައެވެ. ވެސްޓް ސިޓީގެ ދެގޯލުވެސް ކާމިޔާބުކޮށްދިނީ ގޯލްޑަން ތަށި ދަރަނބޫދޫއަށް ހޯދައިދިނުމުގައި މުހިންމު ދައުރެއް އަދާކޮށް ފައިނަލް މެޗުގެ މޮޅުކޮށްދިން ގޯލުޖަހައިދިން ސާޖިދު (ސާއްޓެ) އެވެ.

މުބާރާތުގެ ގޯލު ޗާޓުގެ އެއްވަނައިގައި މިވަގުތުގައި 6 ގޯލާއެކު އޮތީ އަލް ފައުޒްގެ އަރީޝްއެވެ.

މިމުބާރާތުގައި މިރޭވެސް ފޯރިގަދަ މެޗުތަކެއް ކުޅެވޭނެއެވެ. މިމުބާރާޓުގެ ހުރިހާ މެޗެއްވެސް މެންދުރު ޓީވީއިން ދުރަށް ދައްކާނެއެވެ.