އުމްރާގެ އަޅުކަން އަދާކުރާ މީހުން ރާއްޖެ އައުމާ ގުޅިގެން މާދަމާގެ މެންދުރު އެއަރޕޯޓް ތޮއްޖެހިދާނެ ކަމަށް ބެލެވޭތީ، އެ ކަމަށް ސަމާލުވުމަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން އިލްތިމާސްކޮށްފިއެވެ.

އެމްއޭސީއެލްގެ ރަސްމީ "އެކްސް" އެކަނއުންޓުގައި ހިއްސާކުރި ޕޯސްޓެއްގައި އިލްތިމާސްކޮށްފައި ވަނީ، މާދަމާ މެންދުރު 14:00 އާއި 16:00 އާއި ދެމެދު ފުރާ ހުރިހާ ފަރާތްތަކުން އެއާޕޯޓު މަގުތަކާއި ޓާމިނަލް ސަރަހައްދުތަކުގައި ޓްރެފިކް ބޮޑުވާނެތީ އެކަމަށް ސަމާލުވުމަށެވެ. އަދި އެވަގުތު ދަތުރުފަތުރުގެ ތަޖުރިބާ ފަސޭހަކަމާ އެކު ކުރިއަށް ގެންދިއުމަށް ޓަކައި، ފަސިންޖަރުން ފުރުމުގެ ކުރިން ވީހާވެސް އަވަހަށް އެއާޕޯޓަށް އައުމަށްވެސް ވަނީ އިލްތިމާސްކޮށްފައެވެ.

މީގެ އިތުރުން، އެމްއޭސީއެލް އިން ވަނީ މި ޕީކް ޓައިމްގައި ހުރިހާ ޓެކްސީ ސެންޓަރުތަކާއި ޑްރައިވަރުންގެ އެއްބާރުލުމަށާއި، ވަގުތުން ފަސިންޖަރުން ނެގުމާއި ޑްރޮޕް އޮފްތައް ކަށަވަރުކޮށް، އެއާޕޯޓުގެ ވަށައިގެން ޓްރެފިކް ފްލޯ ދެމެހެއްޓުމަށް އެދިފައެވެ. އަދި އެއްވެސް ފަރާތަކަށް އެހީތެރިކަން ބޭނުންވާ ނަމަ އެހީތެރިކަން ފޯރުކޮށްދޭން އެއަރޕޯޓުގައި މުވައްޒަފުން ތިބޭނެ ކަމަށް އެމްއޭސީއެލްއިން ބުނެއެވެ.

ވީމާ މިކަމަށް، އެންމެހާ ފަސިންޖަރުންނާއި، ޓެކްސީ ސެންޓަރުތަކާއި ޑްރައިވަރުންގެ އެއްބާރުލުން ދިނުމަށް އެމްއޭސީއެލްއިން ވަނީ އެދިފައެވެ.