އެލްފޯކަލްޕގައި އަލްފައުޒް ނިއުޖެނެރޭޝަން ގަޓްސިޓީ ބަލިކޮށް ސެމީފައިނަލުގެ އުއްމީދު އާކޮށްފިއެވެ. ގްރޫޕް 1 ގައި ފެލޭލާ ކުޅުނު ހުރިހާ މެޗަކުން މޮޅުވެ 12 ޕޮއިންޓާއެކު ސެމީގެ ޖާގައެއް ކަށަވަރުކޮށްފައިވާއިރު ފައުޒް ނިއުޖެނެރޭޝަންގެ އިތުރުން ވައިޕާރސް އާއި ގަޓްސިޓީއަށްވެސް ސެމީގެ ފުރުސަތު ވަނީ ހުޅުވިފައެވެ.

Ad by Hajj Corporation

އަލްފައުޒް ނިއުޖެނެރޭޝަން ގަޓްސިޓީ އަތުން ރޭގައި މޮޅުވެފައިވަނީ 2-0 އިންނެވެ. ފައުޒްގެ ގޯލުތައް ކާމިޔާބުކޮށްދިނީ ޝުޢޫން އާއި ރަޒާންއެވެ. މިއީ މިމުބާރާތުގެ ނިއުޖެނެރޭޝަން މޮޅުވި ފުރަތަމަ މެޗެވެ.

މިގްރޫޕްގައި ރޭގައި ސެމީގެ ޖާގައެއް ހޯދާފައިވާ ފެލޭލާ ސީއެސް ސްޕޯރޓްސް އަތުން 7-3 ގެ ތަފާތު ބޮޑު ނަތީޖާއަކުން ވަނީ މޮޅުވެފައެވެ. ފެލޭލާގެ ޝާމިން މިމެޗުގައި ހެޓްރިކް ހަދާފައިވާއިރު، މާހިލް (މާއްޕެ) އާއި ޖުނައިދު (ޖެންނޭ) ވެސް ގޯލުޖަހާފައިވެއެވެ. މީގެ އިތުރުން ފެލޭލާގެ ރިފާއު އާއި މެޑޯ ގެ ފަރާތުންވެސް މުބާރާތުގެ ފުރަތަމަ ގޯލުފެނިފައިވެއެވެ. ސްކޯޕިއަންގެ އާމިލް ދެ ގޯލު ކާމިޔާބުކޮށްފައިވާއިރު މާއިންވެސް ވަނީ ގޯލެއް ޖަހާފައެވެ.

މިގްރޫޕްގައި ސެމީގެ ޖާގައެއް ހޯދުމަށް މިއަދު ނިއުޖެނެރޭޝަން ވައިޕަރސް އާއި ވާދަކުރާއިރު، ގަޓް ސިޓީ ނިކުންނާނީ ސީއެސް ސްޕޯރޓްސް އާއި ދެކޮޅަށެވެ.

ގްރޫޕް ދޭއްގައި ވެސްޓް ސިޓީއާއި ވައިޕަރސް ވާދަކުރިމެޗު 0-0 އިން އެއްވަރުވެފައިވުމުން މިގްރޫޕްގެ ވާދަވެރިކަން ވަނީ ބޮޑުވެފައެވެ. އެގޮތުން މިގްރޫޕްގެ ސެމީގެ ފަހުޖާގައެއް ހޯދުމަށް މިރޭ ވެސްޓް ސިޓީ އޭއެމްޑީ އާއި ދެކޮޅަށް ނިކުންނައިރު، ރައިޑަރސް ނިކުންނާނީ ޒަލްލަލާ އާއި ދެކޮޅަށެވެ.

މިގްރޫޕްގެ ހުރިހާ މެޗަކުން މޮޅުވެ ސެމީގެ ޖާގައެއް ކަށަވަރުކޮށްފައިވާ އަލް ފައުޒް ސްޕޯރޓްސް ވަނީ ރޭގައި 6-1 ގެ ތަފާތުބޮޑޫ ނަތީޖާއަކުން އޭއެމްޑީ ބަލިކޮށްފައެވެ. މިމެޗުގެ ފައުޒްގެ ގޯލުތައް އަރީޝް އާއި އަލީ ރިޒާ އާއި ސޮލާޙު ގެ އިތުރުން ހުޝާމް ކާމިޔާބުކޮށްފައިވާއިރު، ރިޒާ އާއި ހުޝާމް ވަނީ ދެގޯލު ކާމިޔާބުކޮށްފައެވެ. އޭއެމްޑީގެ ހަމައެކަނި ގޯލުކާމިޔާބުކޮށްފައިވަނީ މުނީރުއެވެ. އޭއެމްޑީ ވަނީ މުބާރާތުގައި ކުޅުނު ތިންމެޗުންވެސް ބަލިވެ މުބާރާޓުން ކަޓާފައެވެ.

މުބާރާތުގެ ގޯލު ޗާޓުގެ އެއްވަނައިގައި މިވަގުތު އޮތީ ފެލޭލާގެ ސާމިންއެވެ.

މިމުބާރާތުގެ ގްރޫޕް ސްޓޭޖުގެ ފަހުމެޗުތައް މިއަދު ކުޅޭއިރު، ސެމީފައިނަލް މާދަމާ ރޭގަނޑު ކުޅެވޭނެއެވެ. އަދި ފައިނަލް މެޗު އޮންނާނީ އާދިއްތަދުވަހުގެ ރޭ 20:45 ގައެވެ. މިމުބާރާތުގެ ހުރިހާ މެޗެއްވެސް މެންދުރު ޓީވީއިން ލައިވް ކުރާނެއެވެ.