ބައިބަލާ އެސޯސިއޭޝަން އޮފް މޯލްޑިވްސްއިން އިންތިޒާމުކޮށްގެން ކުރިއަށްގެންދާ ޢީދު ބައިބަލާ ޗެލެންޖް 1446 ގެ ސެމީ ފައިނަލަށް ޓީއެފްޓީ އާއި، ލޮރެންޒޯ ސްޕޯޓްސް ކުލަބާއި، މިދިޔަ އަހަރުގެ ރަނަރަޕް ކުލަބު ކާސިންޖީ އަދި ޒެޕޯ ދަތުރުކޮށްފިއެވެ.

ހުޅުމާލޭ ސެންޓްރަލް ޕާކް ސަރަހައްދުގައި ކުރިއަށްދާ މި މުބާރާތުގައި 29 ޓީމެއް ބައިވެރިވެފައިވާއިރު، ރޭ ކުޅުނު ކުއާޓާ ފައިނަލް މެޗުތަކުގައި ޓީއެފްޓީން ވަނީ ޓީސީ ސްޕޯޓްސް ކުލަބު ސީދާ ދެ ގޭމުން ބަލިކޮށް ސެމީގެ ޖާގައެއް ކަށަވަރުކޮށްފައެވެ. މި މެޗުގެ ގޭމުތައް ޓީއެފްޓީން ކާމިޔާބުކުރީ 9-8 އަދި 19-0 އިންނެވެ.

Ad by Hajj Corporation

ލޮރެންޒޯއިން ސެމީގެ ޖާގައެއް ހޯދީ އެލްޓީ ސްޕޯޓްސް ކުލަބު އަތުން މޮޅުވެގެންނެވެ. ފުރަތަމަ ގޭމް 20-1 އިން ކާމިޔާބުކުރި ލޮރެންޒޯއިން ދެވަނަ ގޭމް 6-6 އިން އެއްވަރުކުރުމާއެކު ސެމީގެ ޖާގައެއް ކަށަވަރުކުރިއެވެ.

މިދިޔަ އަހަރުގެ ރަނަރަޕް ކާސިންޖީ އާއި ބައިބަލާގެ 10 ގުނަ ޗެމްޕިއަން ބީޖީ ސްޕޯޓްސް ކުލަބާ ދެމެދު ކުޅުނު މެޗުގައި ކާސިންޖީ ވަނީ ގަދަހިފުމަކުން މޮޅުވެފައެވެ. ފުރަތަމަ ގޭމް 7-6 އިން ކާސިންޖީން ކާމިޔާބުކުރި ނަމަވެސް، ދެވަނަ ގޭމް 6-5 އިން ބީޖީން ކާމިޔާބުކުރުމާއެކު މެޗު ގަދަހިފުމަކަށް ގޮސް، ކާސިންޖީން ވަނީ ދެވަނަ އަދި ތިންވަނަ ހިފުން ކާމިޔާބުކޮށްފައެވެ.

މުބާރާތުގެ ސެމީގެ ފަހު ޖާގަ ޒެޕޯއިން ހޯދީ ކުޑަ ހެންވޭރު ލަޔަންސް 6-5 އަދި 12-10 އިން ބަލިކޮށްގެންނެވެ. މާދަމާ ރޭ ކުޅޭ ސެމީ ފައިނަލްގައި ލޮރެންޒޯ ނުކުންނާނީ ޒެޕޯއާ ދެކޮޅަށް އަދި ކާސިންޖީ ކުޅޭނީ ޓީއެފްޓީއާ ދެކޮޅަށެވެ. ފާހަގަކޮށްލެވޭ ކަމަކީ މި ހަތަރު ޓީމަކީވެސް މީގެ ކުރިން ބައިބަލާގެ ޗެމްޕިއަންކަން ލިބިފައިނުވާ ޓީމުތަކަކަށްވުމެވެ.