ފިތުރު ޢީދު ބައިބަލާ ޗެލެންޖު 1446 ގެ ޗެމްޕިއަންކަން ފުރަތަމަ ފަހަރަށް ދަ ފުޓްސެލް ޓައުން (ޓީއެފްޓީ) އިން ކާމިޔާބުކޮށްފިއެވެ. ފައިނަލްގައި ލޮރެންޒޯ ސްޕޯޓްސް އާ ކުރިމަތިލި ޓީއެފްޓީން ވަނީ ދެ ގޭމުގެ ނަތީޖާއިން ކުރިހޯދައި މުބާރާތުގެ ތަށި އަތުލާފައެވެ.

Ad by Hajj Corporation

މިފަހަރުގެ ބައިބަލާ މުބާރާތަކީ ރާއްޖޭގެ ތާރީޚުގައި އެންމެ ފުރިހަމަކޮށް ބޭއްވުނު ބައިބަލާ ޗެލެންޖުގެ ފައިނަލް މެޗެވެ. ފމިމެޗުގެ ފުރަތަމަ ބައިގައި ޓީއެފްޓީން ވަނީ ލޮރެންޒޯ ސްޕޯޓްސްގެ މައްޗަށް 9-3 ގެ ބޮޑު ނަތީޖާއަކުން ކުރިހޯދާފައެވެ. މެޗުގެ ދެވަނަ ބައިގައި ދެޓީމުން ވަނީ ފޯރިގަދަ ކުޅުމެއް ދައްކާފައެވެ. މި މެޗު ނިމެން ތިން މިނެޓަށް ވެފައި ވަނިކޮށް ޓީއެފްޓީން ވަނީ 7-7 އަށް މެޗު އެއްވަރުކޮށް، ބައިބަލާގެ ތަށި ހޯދުމުގެ ހުވަފެން ހަގީގަތަކަށް ހަދާފައެވެ.

މި އަހަރުގެ މުބާރާތުގެ "މިސްޓަރ ބައިބަލާ" ގެ މަގާމަށް ހޮވިފައިވަނީ ލޮރެންޒޯ ސްޕޯޓްސްގެ ކުޅުންތެރިޔާ އަބްދުﷲ ނިޝާން (އަބޯ) އެވެ. މިއީ އޭނާ މި މަގާމު ހޯދި ތިންވަނަ ފަހަރެވެ. މުބާރާތުގައި އޭނާ ވަނީ ފާހަގަކޮށްލެވޭ މޮޅު ކުޅުމެއް ދައްކާފައެވެ.

ކޮންމެ އަހަރަކުވެސް ފިތުރު ޢީދާ ދިމާކޮށް ބައިބަލާ އެސޯސިއޭޝަނުން އިންތިޒާމުކޮށްގެން ބާއްވާ މި މުބާރާތަކީ ރާއްޖޭގެ ކުލަބުތަކުން ބޮޑެތި ޚަރަދުތަކެއް ކޮށްގެން ތައްޔާރުވާ މުބާރާތެކެވެ. މިއަހަރުގެ މުބާރާތުގައި ރެކޯޑު އަދަދެއްގެ ގޮތުގައި 29 ޓީމަކުން ވަނީ ބައިވެރިވެފައެވެ.