ކްރިސްޓިއާނޯ ރޮނާލްޑޯ ޖެހި ދެ ލަނޑާއެކު ސައުދީ ޕްރޯ ލީގުގައި އަލް ނަސްރުންވަރުގަދަ އަލް ހިލާލް ބަލިކޮށްފިއެވެ. އަލް ހިލާލްގެ ދަނޑުގައި ރޭ ކުޅުނު މެޗުގައި އަލް ހިލާލާ ވާދަކޮށް އަލް ނަސްރު ކުރިހޯދާފައިވަނީ 3-1 ގެ ނަތީޖާއަކުންނެވެ.

މި މެޗުގައި އެންމެ ފުރަތަމަ ލީޑު ނެގީ އަލް ނަސްރުންނެވެ. މިގޯލުޖެހީ ފުރަތަމަ ހާފުގެ އިތުރު ވަގުތުގައި އަލީ އަލް ހަސަން އެވެ. އަދި ދެވަނަ ހާފު ފެށިގެން ދެވަނަ މިނެޓުގައި ސަދިއޯ މާނޭގެ އެސިސްޓަކުން ރޮނާލްޑޯ ޖެހި ލަނޑާއެކު އަލް ނަސްރުގެ ލީޑު ފުޅާކުރިއެވެ.

މެޗުގެ 62 ވަނަ މިނެޓުގައި އަލް ހިލާލުގެ އަލީ އަލް ބުލައިހީ ކޯނަރަކުން ޖެހި ލަނޑާއެކު އެ ޓީމަށް މެޗުގެ ތެރެއަށް އަނބުރާ އައުމުގެ ފުރުސަތު ލިބިގެންދިޔައެވެ. ނަމަވެސް މެޗުގެ 88 ވަނަ މިނެޓުގައި އަލް ހިލާލުގެ މޫތެބް އަލް ހަރްބީއަށް ހެދުނު ގޯހެއްގެ ސަބަބުން ލިބުނު ޕެނަލްޓީ ރޮނާލްޑޯ ކާމިޔާބުކޮށް އަލް ނަސްރަށް ތިން ޕޮއިންޓް ކަށަވަރުކޮށްދިނެވެ.

މިވަގުތު ސައުދީ ޕްރޯ ލީގުގެ ޕޮއިންޓް ތާވަލުގައި އަލް ނަސްރު އޮތީ 54 ޕޮއިންޓާއެކު ތިންވަނައިގައެވެ. 57 ޕޮއިންޓާއެކު އަލް ހިލާލް އޮތީ ދެވަނައިގައެވެ. އަދި 61 ޕޮއިންޓާއެކު އަލް އިއްތިހާދު އޮތީ އެއްވަނައިގައެވެ.

ރޭގައި ޖެހި ދެގޯލާއެކު ރޮނާލްޑޯ ވަނީ އޭނާގެ ކެރިއަރުގައި މިހާތަނަށް 931 ގޯލު ކާމިޔާބުކޮށްފައެވެ. ފުޓްބޯޅައިގެ ތާރީޚުގައި މިހާތަނަށް އެންމެ ގިނަ ގޯލް ޖަހާފައިވާ ރޮނާލްޑޯގެ މިހާރުގެ އަމާޒަކީ ކެރިއަރުގައި 1000 ގޯލު ހަމަކުރުމެވެ.