ރާއްޖޭގައި ބޭރު ގައުމެއްގެ ލައިސަންސް އޮންނަ ބިދޭސީންނަށް ވެހިކަލް ދުއްވުމުގެ ހުއްދަ ދިނުމުގައި އަމަލުކުރާ އުސޫލަށް ބަދަލެއް ގެނެސްފިއެވެ.

މިގޮތުން މީގެ ފަހުން ބިދޭސީންނަށް ރާއްޖޭގައި ވެހިކަލް ދުއްވުމުގެ ހުއްދަ ދޭނީ ޑްރައިވިންގ އިމްތިޙާނެއް ހެދުމަށް ފަހުގައެވެ.

ރައީސުލްޖުމްހޫރިއްޔާގެ އޮފީހުގައި އިއްޔެ ބޭއްވުނު ނޫސްވެރިންގެ ބައްދަލުވުމެއްގައި ދަތުރުފަތުރާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީން ވިދާޅުވި ގޮތުގައި މީގެ ކުރިން ބިދޭސީންގެ އަތުގައި އޮންނަ ބޭރު ގައުމެއްގެ ލައިސަންސަށް ހުއްދަ ދެމުން ދިޔައީ ލުއި އުސޫލެއްގެ ދަށުންނެވެ. އަދި ބައެއް ފަހަރު ބިދޭސީ މީހާގެ އަތުގައި އޮންނަ ލައިސަންސްގެ މުއްދަތަށްވުރެ ދިގު މުއްދަތަކަށް ވެސް ހުއްދަ ދެމުން ދިޔަކަން ވަޒީރު ފާހަގަކުރެއްވިއެވެ.

"މިސާލަކަށް ބިދޭސީ މީހާގެ އަތުގައި އޮތް ޕާސްޕޯޓްގެ ވެލިޑިޓޭޝަނަކީ ދެ މަސް ވިއަސް، އެއް އަހަރު ވިއަސް 10 އަހަރަށް ދިވެހި ލައިސަންސް އެބަ ދޫކުރެވޭ،" ވަޒީރު ވިދާޅުވިއެވެ.

އެހެންނަމަވެސް މީގެ ފަހުން ބިދޭސީންނަށް ރާއްޖޭގައި ވެހިކަލް ދުއްވުމުގެ ހުއްދަ ދޭނީ އެ މީހެއްގެ އަތުގައި އޮންނަ ބޭރު ގައުމުގެ ލައިސަންސްގެ މުއްދަތަށް ކަމަށް ވަޒީރު ވިދާޅުވިއެވެ. އަދި މި ހުއްދަ ދޫކުރެވޭނީ އާންމު އުސޫލުން ލައިސަންސް ހޯދަން އޮންނަ ޑްރައިވިންގ އެސެސްމަންޓް ފުރިހަމަ ކުރުމަށްފަހުގައި ކަމަށްވެސް ވަޒީރު ވިދާޅުވިއެވެ.

މި ބަދަލު ގެނައުމުގެ މަޤްސަދު ބަޔާންކުރައްވަމުން ވަޒީރު ވިދާޅުވީ މާލޭގައި ދަތުރުކުރަން އޮންނަނީ ކުދި ގޯޅިތަކެއް ކަމަށާއި، ބޭރު ގައުމުތަކުގައި ދުއްވާއިރު ވިސްނަން ޖެހޭ އުކުޅުތަކާ ތަފާތު ވެދާނެ މާލޭގައި ދުއްވަން ކަމަށެވެ. އެހެންކަމުން މި ބަދަލާއެކު ބިދޭސީންނަށް ވެސް ލައިސަންސް ދޫކުރެވޭނީ ދިވެހިންނެކޭ އެއްގޮތަށް ޑްރައިވިންގ އެސެސްމަންޓް ހެދުމަށްފަހު ކަމަށް ވަޒީރު ވިދާޅުވިއެވެ.