އާސެނަލްގެ ތަރި ބުކާޔޯ ސަކާ ވަނީ މި މިސީޒަނުގެ ޗެމްޕިއަންސް ލީގް ކާމިޔާބު ކުރެވޭނެ ކަމުގެ ޔަގީންކަން އެބައޮތްކަން ހާމަކޮށްފައެވެ. މިކަން އޭނާ ހާމަކޮށްފައިވަނީ ކުއާޓަރ ފައިނަލްގައި ރިއަލް މެޑްރިޑް ޓީމެއް ބަލިކުރުމަށް ފަހުގައި ނޫސްވެރިންނާއި ވާހަކަދައްކަމުންނެވެ.

ސެމީ ފައިނަލްގައި އާސެނަލް ކުރިމަތިލާނީ ފްރާންސްގެ ވަރުގަދަ ޓީމް ޕީއެސްޖީ އާ އެވެ. މި މެޗާ ގުޅޭ ގޮތުން ނޫސްވެރިން ކުރި ސުވާލުތަކަށް ޖަވާބު ދެމުން ސަކާ ބުނީ ޕީއެސްޖީ އަކީ ވަރަށް ތަފާތު ޓީމެއް ކަމަށެވެ.

Ad by Hajj Corporation

"އެ ޓީމް މިހާރު ކުޅެމުންދަނީ މާ ބޮޑު އިތުބާރަކާ އެކުގައި. އިއްޔެވެސް އަހަރެމެން އެ ޓީމުގެ މެޗެއް ބެލިން. އެ މީހުން ވަރަށް މޮޅު. އެކަމަކު އަހަރެމެން ތައްޔާރުވާނަން. ވަރަށް ބޮޑު ގޮންޖެހުމަކަށް ވާނެ. ވަރަށް ރަނގަޅު ގޮންޖެހުމެއް. އެކަމަކު އަހަރެމެން ތައްޔާރުވާނަން،" ސަކާ ބުންޏެވެ.

ޗެމްޕިއަންސް ލީގް ކާމިޔާބު ކުރެވިދާނެތޯ ސުވާލު ކުރުމުން ސަކާ ބުނީ އެކަމަށް އޭނާ ޔަގީން ކުރާ ކަމަށެވެ. "އާނ، އަހަރެން އެކަމަށް ޔަގީން ކުރަން. އަހަރެން ހިތުން އަހަރެމެންނަށް އެކަން ކުރެވޭނެ،" އޭނާ ބުންޏެވެ.
ޗެންޕިއަންސް ލީގުގެ ފައިނަލަށް އާރސެނަލް ދަތުރުކޮށްފިނަމަ އާރސެނަލް ވާދަކުރަން ޖެހޭނީ ބާސާ ނުވަތަ އިންޓަރ މިލާން އާއި ދެކޮޅަށެވެ.

މިއީ އާސެނަލް ވޭތުވެ ދިޔަ 15 އަހަރުތެރޭގައި ޗެމްޕިއަންސް ލީގުގެ ސެމީ ފައިނަލަށް ގޮސްފައިވާ ދެވަނަ ފަހަރެވެ.