ޔޫއެފާ ކޮންފަރެންސް ލީގުގެ ކުއާޓަރ ފައިނަލްގެ ދެވަނަ ލެގުގައި ޕޮލެންޑްގެ ލެގިއާ އާއި ދެކޮޅަށް ކުޅުނު މެޗުން 2-1 އިން ބަލިވި ނަމަވެސް، 4-2 ގެ އެގްރިގޭޓް ނަތީޖާއަކުން ޗެލްސީން ވަނީ މި މުބާރާތުގެ ސެމީ ފައިނަލަށް ދަތުރުކޮށްފިއެވެ.

ޗެލްސީގެ ސްޓެމްފޯޑް ބްރިޖުގައި ކުޅުނު މި މެޗުގައި ލެގިއާއިން ލީޑުނެގީ 10 ވަނަ މިނެޓުގައި ލިބުނު ޕެނަލްޓީއަކުން ތޯމަން ޕެކްހާޓްއެވެ. ނަމަވެސް 33 ވަނަ މިނެޓުގައި ޖޭޑަން ސަންޗޯގެ ޕާހަކުން މާކް ކުކުރެޔާ ވަނީ މެޗުގެ ނަތީޖާ އެއްވަރުކޮށްފައެވެ. ދެވަނަ ހާފުގެ ކުޅުން ފެށުނުތާ އަށް މިނެޓު ފަހުން ސްޓީވް ކަޕުއާޑީ ޖެހި ލަނޑުން ލެގިއާއިން މި މެޗު ކާމިޔާބުކުރި ނަމަވެސް، ފުރަތަމަ ލެގުގައި 3-0 އިން މޮޅުވެފައިވާތީ ޗެލްސީއަށް ވަނީ ސެމީ ފައިނަލުގެ ޖާގަ ކަށަވަރުކޮށްފައެވެ.

Ad by Hajj Corporation

މިއީ 2021 ވަނަ އަހަރަށްފަހު ފުރަތަމަ ފަހަރަށް ޔޫރަޕްގެ މުބާރާތެއް ކާމިޔާބުކުރުމަށް މަސައްކަތްކުރަމުންދާ ޗެލްސީއަށް ލިބިގެންދިޔަ މުހިންމު ފުރުސަތެކެވެ.

މި މުބާރާތުގެ ސެމީ ފައިނަލުގައި ޗެލްސީ ކުޅޭނީ ސްވިޑަންގެ ޖާރގާޑަން އާ ދެކޮޅަށެވެ. ޖާރގާޑަން ސެމީ ފައިނަލަށް ގޮސްފައިވަނީ ރެޕިޑް ވިއެނާ 4-2 ގެ އެގްރިގޭޓް ނަތީޖާއަކުން ބަލިކުރުމަށްފަހުއެވެ. މި މުބާރާތުގެ ޗެމްޕިއަންކަން ޗެލްސީން ހޯދައިފިނަމަ، ކުރިއަށް އޮތް ސީޒަނުގެ ޔޫރޮޕާ ލީގުގެ ޖާގައެއް އެ ޓީމަށް ލިބިގެންދާނެއެވެ.