ޔޫއެފާ ޔޫރޮޕާ ލީގުގެ ކުއާޓަރ ފައިނަލުގެ ދެވަނަ ލެގުގައި އެއިންޓްރެކްޓް ފްރެންކްފަޓް އާއި ދެކޮޅަށް ކުޅުނު މެޗު 1-0 އިން ކާމިޔާބުކޮށް، ޓޮޓްނަމް ހޮޓްސްޕަރ މުބާރާތުގެ ސެމީ ފައިނަލުގެ ޖާގައެއް ހޯދައިފައެވެ. މި ދެ ޓީމުގެ މެދުގައި ކުޅުނު ދެ މެޗުގެ އެގްރިގޭޓް ނަތީޖާއަކީ 2-1 އެވެ.

މެޗުގެ ހަމައެކަނި ލަނޑު ޖެހުނީ ފުރަތަމަ ހާފު ނިމެން ދެ މިނެޓަށް ވެފައި ވަނިކޮށެވެ. އެއީ ފްރެންކްފަޓްގެ ގޯލްކީޕަރު ކައުއާ ސަންޓޯސް، ޖޭމްސް މެޑިސަން އަށް ކުރި ފައުލަކާ ގުޅިގެން ޓޮޓްނަމް އަށް ލިބުނު ޕެނަލްޓީއެކެވެ. ވީއޭއާރު ގެ އެހީގައި ރެފްރީ ނިންމުން ބަދަލުކުރުމަށްފަހު ދިން މި ޕެނަލްޓީ ގޯލަކަށް ބަދަލުކުރީ ޑޮމިނިކް ސޮލާންކޭ އެވެ.

މި ލަނޑަށްފަހު ޓޮޓްނަމްގެ ކުޅުންތެރިން ކުޅެފައިވަނީ ޑިފެންސިވް ސްޓައިލެއްގައެވެ. އެގޮތުން އެ ޓީމުން ބޮޑަށް އިސްކަންދީފައިވަނީ ކައުންޓަރ އެޓޭކްތަކުގައި އިދިކޮޅު ޓީމުގެ ގޯލަށް ނުރައްކާކުރުމަށެވެ. މެޗުގެ ދެވަނަ ހާފުގައި ޓޮޓްނަމް އަށް ލިބުނު ފުރުސަތުތަކުގެ ތެރެއިން ކްރިސްޓިއަން ރޮމޭރޯ އާއި ރޮޑްރިގޯ ބެންޓަންކޫރު އަށް ލިބުނު ފުރުސަތުތައް ފާހަގަކޮށްލެވެއެވެ.

ސެމީގައި ޓޮޓްނަމް ވާދަކުރަން ޖެހޭނީ ނޯވޭގެ ބޯޑޯ ގްލިމްޓް އާއި ދެކޮޅަށެވެ.