ވީއޭއެމް ކަޕް 2025 ގެ ފައިނަލްގައި ޕޮލިސް ކުލަބާ ކުރިމަތިލައި، ސީދާ ތިން ސެޓުން މޮޅުވެ، ވެމްކޯއިން ފަސްވަނަ ފަހަރަށް ޗެމްޕިއަންކަން ހޯދައިފިއެވެ. ޒުވާނުން މަރުކަޒުގެ އެތެރޭ ކޯޓުގައި ކުޅުނު މި މެޗުގައި ވެމްކޯއިން ވަނީ 25-20، 25-19، 25-19 އިން މޮޅުވެފައެވެ.

މެޗުގެ ފުރަތަމަ ސެޓުގައި ޕޮލިހުން ވަރަށް ގާތުން ވާދަކުރި ނަމަވެސް، ވެމްކޯއިން އެ ސެޓު ކާމިޔާބުކުރީ 25-20 އިންނެވެ. ދެވަނަ ސެޓުގައި ވެމްކޯ އިން ވަނީ ކުޅުން އިތުރަށް ރަނގަޅުކޮށް، 25-19 އިން އެ ސެޓު ކާމިޔާބުކޮށްފައެވެ. ތިންވަނަ ސެޓުގައި ޕޮލިހުން ފުރަތަމަ ލީޑު ނެގި ނަމަވެސް، ސެޓުގެ މެދުތެރެއިން ވެމްކޯއިން ވަނީ ފަހަރުން އަރައި ، 25-19 އިން މޮ ސެޓު ކާމިޔާބުކޮށް މުބާރާތުގެ ތަށި ނަގާފައެވެ.

މި މެޗުގެ މޮޅު ކުޅުންތެރިޔާގެ އިނާމު ވެމްކޯގެ ތައިލޭންޑް ކުޅުންތެރިޔާ ޕައްޓިޔާއަށް ލިބުނެވެ. މުޅި މުބާރާތުގެ އެންމެ މޮޅު ކުޅުންތެރިޔާގެ އިނާމާއި ބެސްޓް އައުޓްސައިޑް އެޓޭކަރގެ މަގާމު ވެމްކޯގެ އައިޝަތު މާޖިދާ ހޯދިއެވެ. އަދި ވެމްކޯގެ އައިޝަތު ޖޫޒާން ޒަރީރު އެންމެ މޮޅު ސެޓަރގެ މަގާމު ހޯދިއިރު، ނުހާ ވަހީދު އެންމެ މޮޅު ލިބަރޯގެ މަގާމު ހޯދިއެވެ.މުބާރާތުގެ ވަނަވަނަ އަށް ދިޔަ ފަރާތްތައް. ފޮޓޯ: ވީއޭއެމް

ޕޮލިސް ޓީމުން ހައްވާ ރާޝިދާ އެންމެ މޮޅު އޮޕަސިޓް ޕްލެޔަރގެ މަގާމު ހޯދިއިރު، މަރިޔަމް އަޒުމާ އެންމެ މޮޅު މިޑިލް ބްލޮކަރގެ މަގާމު ހޯދިއެވެ. މުބާރާތުގެ އެންމެ އުންމީދީ ކުޅުންތެރިޔާގެ މަގާމު ހުރާ ކޮމިއުނިޓީ ކުލަބުގެ އައިޝަތު ދީމާ ނަދީމް ހޯދިއެވެ.

މުބާރާތުގެ އެންމެ މޮޅު ކޯޗުގެ މަގާމު ވެމްކޯގެ އަހުމަދު އަދީލް ހޯދިއެވެ. ޗެމްޕިއަން ޓީމަށް ޓްރޮފީއާއި މެޑަލް ހަވާލުކޮށްދެއްވީ ކުޅިވަރު ވަޒީރު އަބްދުﷲ ރާފިއުއެވެ. އަންނަ ހޮނިހިރު ދުވަހު ފެށޭ ގައުމީ ވޮލީބޯލް ލީގަކީ މިއަހަރުގެ ވޮލީބޯލް ސީޒަންގެ އަންހެންގެ ދެވަނަ މުބާރާތެވެ.