ބާސެލޯނާގެ ކޯޗް ހާންސީ ފްލިކް ވިދާޅުވެފައިވަނީ މިމަހުގެ 26 ވަނަ ދުވަހު ކުޅެވޭ ކޯޕާ ޑެލް ރޭގެ ފައިނަލްގައި ރިއަލް މެޑްރިޑް ބަލިކޮށް މުބާރާތް ކާމިޔާބުކުރިޔަސް އެކަން ބޮޑަށް ފާހަގަކުރުމުގެ ޕްރޮގްރާމްތަކެއް ނުބޭއްވޭނެ ކަމަށެވެ.

މުންޑޯ ޑިޕޯޓިވޯއިން ރިޕޯޓުކުރި ގޮތުގައި ފްލިކް މިގޮތަށް ނިންމެވި ސަބަބަކީ ކޯޕާ ޑެލް ރޭގެ ފައިނަލް ކުޅުމަށްފަހު ހަމައެކަނި ހަތަރު ދުވަހުގެ ތެރޭގައި ޗެމްޕިއަންސް ލީގުގެ ސެމީ ފައިނަލްގައި އިންޓަރ މިލާނާ ދެކޮޅަށް ކުޅެން ޖެހޭތީއެވެ.

Ad by Hajj Corporation

ފްލިކްގެ އިރުޝާދުގެ ދަށުން، ސެވިއްޔާގައި ކުޅޭ ފައިނަލް މެޗް ކާމިޔާބުކޮށްފިނަމަ، ޓީމުގެ ފަރާތުން އެއްވެސް ބޮޑު ފާހަގަކުރުމެއް ނުބާއްވާ، ހަމައެކަނި ސެވިއްޔާގެ ހޮޓަލެއްގައި ޓީމުގެ ޑިނަރއެއް ބޭއްވުމަށް ވަނީ ހަމަޖެހިފައެވެ.

ކުޅުންތެރިންގެ ހަކަތަ އެންމެ މުހިންމު މެޗަށް ރައްކާކުރުމަށް މަސައްކަތްކުރާ ފްލިކްގެ އަމާޒަކީ ޗެމްޕިއަންސް ލީގުގެ ތަށި ހޯދުމެވެ. އެސްޓަޑި އޮލިމްޕިކް ލުއިސް ކޮމްޕަނީސްގައި ކުޅޭ އިންޓަރ މިލާނާ ދެކޮޅު މެޗަށް ކުޅުންތެރިން ވީހާވެސް ތައްޔާރުކޮށް، ފޯމުގައި ބެހެއްޓުމަށް ކޯޗް ވަރަށް ބޮޑު އިސްކަމެއް ދެއްވައެވެ.