ދިވެހިރާއްޖޭގެ މަތީ ތަޢުލީމުގެ މަރުކަޒަކުން އެރުވި ފުރަތަމަ އޮނަރަރީ ޑޮކްޓަރޭޓް، މާފަންނު ތައިބާ، ފަޟީލަތުއްޝައިޚް އިސްމާއިލް މުހައްމަދަށް އަރުވައިފިއެވެ.

މި ޝަރަފު އެމަނިކުފާނަށް އެރުވީ އިސްލާމިކް ޔުނިވަރސިޓީ އޮފް މޯލްޑިވްސްގެ ދަސްވެނިވުމުގެ ރަސްމިއްޔާތުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒުއެވެ.

ދ. މީދޫއަށް އުފަން ޝައިޚް އިސްމާޢިލްގެ ޢިލްމީ ދަތުރު ފެށުނީ ފ. މަގޫދޫގައެވެ. އޭގެފަހުން މާލޭގައި ތަޢުލީމު ހާސިލުކުރެއްވުމަށްފަހު، އިންޑިއާގެ ޓެމިލްނާޑޫގެ ޖާމިޔާ ދާރުއްސަލާމްއާއި މަދީނާ އިސްލާމިކް ޔުނިވަރސިޓީގައި މަތީ ތަޢުލީމު ހާސިލުކުރެއްވިއެވެ. ޝައިޚް އިސްމާޢިލްއަކީ މަދީނާގެ އިސްލާމިކް ޔުނިވަރސިޓީގައި ތަޢުލީމު ޙާސިލުކުރެއްވި ފުރަތަމަ ދިވެހި ދަރިވަރެވެ.

ޝައިޚް އިސްމާޢިލްގެ އެހީތެރިކަމާއެކު 100 އަށްވުރެ ގިނަ ދިވެހި ދަރިވަރުންނަށް ޕާކިސްތާނުގައި ތަޢުލީމު ޙާސިލުކުރުމުގެ ފުރުސަތު ލިބިފައިވެއެވެ. އަދި މާލޭގައި މަދްރަސާ ޠައިބާގެ ނަމުގައި މަދަރުސާއެއް އުފައްދަވައި، ދިވެހި ކުދިންނަށް ޢަރަބި ބަހުން އިސްލާމްދީން އުނގަންނައިދެއްވާފައިވެއެވެ.

ޝައިޚް އިސްމާޢިލްވަނީ ގާޒީއެއްގެ ގޮތުގައި ޝަރަފުވެރި ޚިދުމަތްތަކެއް ކުރައްވާފައެވެ. މިހާތަނަށް 40 ފޮތް ޝާއިޢުކުރައްވާފައިވާއިރު، މިހާރުވެސް "އައް ތަފްސީރު މުޔައްސަރު" ގެ ދިވެހި ތަރުޖަމާ ލިޔުއްވަމުން ގެންދަވައެވެ.

ބައި ޤަރުނަށްވުރެ ދިގު މުއްދަތެއްގައި ޢިލްމު ފެތުރުއްވުމުގައި ޚިދުމަތްކުރައްވާފައިވާ ޝައިޚް އިސްމާޢިލްއަށް މި އޮނަރަރީ ޑޮކްޓަރޭޓް އެރުވުމަކީ އެމަނިކުފާނުގެ ޢިލްމީ އަދި އިޖްތިމާޢީ ޚިދުމަތްތަކަށް ލިބުނު ބޮޑު ޝަރަފެކެވެ.