ރެލިގޭޝަން ޒޯނުގައި އޮތް ލާސް ޕަލްމާސް އިން އެޓްލެޓިކޯ މެޑްރިޑްގެ ލަލީގާގައި ސިހުން ގެނުވައިފިއެވެ. އެގޮތުން މިމެޗުގައި ލަސްޕަލްމާސްގެ ޖަވީ މުނޯޒްގެ އިތުރު ވަގުތުގެ ގޯލަކުން 1-0 އިން ފަހުގަޑީގައި އެތްލެޓިކޯ މެޑްރިޑް ވަނީ ބަލިވެފައެވެ.

މި މޮޅާއެކު ލަސް ޕަލްމާސް ވަނީ 32 ޕޮއިންޓާއެކު ވަގުތީ ގޮތުން ރެލިގޭޝަން ޒޯނުން ސަލާމަތްވެ، 17 ވަނަ ހިސާބަށް އަރާފައެވެ. އެޓްލެޓިކޯ މެޑްރިޑް މިހާރު އޮތީ 63 ޕޮއިންޓާއެކު ތިން ވަނައިގައެވެ. އެއީ ދެވަނައިގައި އޮތް ރެއަލް މެޑްރިޑަށްވުރެ ތިން ޕޮއިންޓް މަދުންނެވެ. އަދި އެއީ އެއްވަނައިގައިވާ ބާސެލޯނާއަށްވުރެ 10 ޕޮއިންޓް މަދުންނެވެ.

މެޗުގެ ގިނަ ވަގުތު ދިޔައީ ދެ ޓީމުގެ މެދުގައި ވާދަވެރި ކުޅުމެއް ނުފެނި، ދެފަރާތުންވެސް މާގިނަ ހަމަލާތަކެއް ފެނިފައި ނުވެއެވެ. ނަމަވެސް ދެވަނަ ހާފުގެ ފަހު މިނެޓުގައި، ލަސް ޕަލްމާސްގެ ގޯލްކީޕަރު ދިންކޯ ހޯކަސް ނެގި ދުރު ފްރީކިކަކަށް އެޓްލެޓިކޯގެ ޑިފެންސުން އެކަށީގެންވާ ރައްދެއް ނުދެވުމުން، މުނޯޒް ވޮލީއެއް ޖަހައި ގޯލްކީޕަރު ޔަން އޮބްލަކްގެ ދަށުން ބޯޅަ ވައްދާލިއެވެ.

މި ގޯލް ފުރަތަމަ އޮފްސައިޑްގެ ސަބަބުން ބާތިލުކުރި ނަމަވެސް، ވީއޭއާރު ރިވިއުއަކަށް ފަހު ވަނީ ގޯލް ދީފައެވެ.

އެޓްލެޓިކޯ މެޑްރިޑް މި މެޗަށް ނިކުތްއިރު ވޭތުވެދިޔަ 11 މެޗުގައި މެދުކެނޑުމެއް ނެތި ގޯލު ކާމިޔާބުކޮށްފައިވާ އިރު، އޭގެ ތެރެއިން ކާމިޔާބުކުރެވުނީ އެންމެ ފަސް މެޗެވެ.