އިޓާލިއަން ސެރީއާގެ އެއްވަނައިގައި އޮތް އިންޓަރ މިލާން ރޭގައި ބޮލޯނާ އަތުން ބަލިވެ، ދެވަނައިގައި އޮތް ނަޕޮލީ އާއި ޕޮއިންޓުގެ ގޮތުން ހަމަހަމަ ވެފައެވެ. ލީގުގައި ބާކީ ހަތަރުމެޗު ދެޓީމަށްވެސް އޮތްއިރު، ލީގު ނިމޭއިރު އެއްވަނަ އަދި ދެވަނަ ޓީމު ޕޮއިންޓުގެ ގޮތުން ހަމަހަމަ ވެއްޖެނަމަ، ޗެންޕިއަންޓީމެއް ކަނޑައަޅާނީ އެދެޓީމު ދެމެދުގައި އެއް ލެގުގެ ފައިނަލެއް ކުޅެގެންނެވެ.

ރޭގައި އިންޓަރ މިލާން ބަލިވީ 1-0 ގެ ނަތީޖާއަކުންނެވެ. މި މެޗުގެ ހަމައެކަނި ލަނޑު ޖެހީ މެޗުގެ އިތުރު ވަގުތުގައި ބޮލޯނާގެ ރިކާޑޯ އޮރްސޮލީނާއެވެ.

މި މެޗުން އިންޓަރ މިލާން ބަލިވުމާއެކު، ތާވަލުގެ ކުރީގައި ތިން ޕޮއިންޓުގެ ފަރަގެއް ހޯދުމަށް އެ ޓީމަށް ލިބުނު ފުރުސަތު ވަނީ ގެއްލިފައެވެ. މިހާރު އިންޓަރ މިލާނާއި ނަޕޮލީއަށް ވަނީ 71 ޕޮއިންޓް ލިބިފައެވެ. ނަމަވެސް އިންޓަރ މިލާން އެއްވަނައިގައި އޮތީ ފައިދާ ގޯލުގެ ތަފާތުންނެވެ.

ސިމޮން އިންޒާގީގެ އިރުޝާދުގެ ދަށުން ކުޅެމުންދާ އިންޓަރ މިލާންގެ ފޯމް ވަނީ ފަހަކަށް އައިސް ދަށްވެފައެވެ. އެގޮތުން ރަށުން ބޭރުގައި އެންމެ ފަހުން ކުޅުނު ހަ މެޗުގެ ތެރެއިން ތިން މެޗުން އެ ޓީމު ވަނީ ބަލިވެފައެވެ.

ޔޫއެފާ ޗެމްޕިއަންސް ލީގުގެ ސެމީ ފައިނަލުގެ ޖާގައެއް ހޯދާފައިވާ އިންޓަރ މިލާނުން މި ސީޒަނުގައި މަސައްކަތް ކުރަމުންދަނީ ތިން މުބާރާތް (ޓްރެބްލް) ކާމިޔާބު ކުރުމަށެވެ. އެއީ ޔޫއެފާ ޗެމްޕިއަންސް ލީގާއި، އިޓާލިއަން ސެރިއާ އަދި އިޓާލިއަން ކަޕެވެ.

އަނެއްކޮޅުން މި މެޗުން މޮޅުވި ބޮލޯނާއިން މަސައްކަތް ކުރަމުންދަނީ ގަދަ ހަތަރެއްގައި ހިމެނި، އަންނަ ސީޒަނުގައި ޔޫއެފާ ޗެމްޕިއަންސް ލީގުގެ ޖާގައެއް ހޯދުމަށެވެ. މި މޮޅާއެކު އެ ޓީމުގެ އުންމީދުތައް އިތުރަށް ވަނީ ފުރިހަމަވެފައެވެ.