ވޭތުވެދިޔަ ފަސް މަސް ދުވަހުގެ ތެރޭގައި މަސްވެރިންނަށް ސަރުކާރުން 1.6 ބިލިއަން ރުފިޔާ ދޫކޮށްފައިވާ ކަމަށް ފިޝަރީޒް އެންޑް އޯޝަން ރިސޯސަސް މިނިސްޓަރު އަހުމަދު ޝިޔާމް ވިދާޅުވެއްޖެ އެވެ.

މިނިސްޓަރު ޝިޔާމް މިހެން ވިދާޅުވީ، ރޭ ޕީއެންސީގެ ޖަހަގައިގައި ބޭއްވި ޖަލްސާގައި ވާހަކަ ދައްކަވަމުންނެވެ.

މިނިސްޓަރު ޝިޔާމް ވިދާޅުވި ގޮތުގައި، ކުރީގެ ސަރުކާރުން މަސް ކިލޯއެއް ގަންނަ އަގު 25 ރުފިޔާއަށް ބަދަލު ކުރީ ސިޔާސީ ބޭނުމަކަށް ކަމަށެވެ.

ރައީސް ޑރ. މުހައްމަދު މުއިއްޒު ވެރިކަމާ ހަވާލުވެ ވަޑައިގަތްއިރު، 250 މިލިއަނަށް ވުރެ ގިނަ ރުފިޔާ މަސްވެރިންނަށް ދައްކަން އޮތް ކަމަށާއި އެ ފައިސާ މަސްވެރިންނަށް ދައްކާ ނިންމީ މި ސަރުކާރުން ކަމަށް ވެސް ޝިޔާމް ވިދާޅުވި އެވެ.

މިނިސްޓަރު ޝިޔާމް އިތުރަށް ވިދާޅުވި ގޮތުގައި، 2023 ވަނަ އަހަރުގެ ނޮވެމްބަރު މަހުގެ 17 ވަނަ ދުވަހުން ފެށިގެން މިހާތަނަށް 1.6 ބިލިއަން ރުފިޔާ މަސްވެރިންނަށް ސަރުކާރުން ދީފައިވެ އެވެ. އަދި މިހާރު ވެސް މަސްވެރިންނަށް ފައިސާ ދޫކުރުން ކުރިއަށްދާ ކަމަށާއި، މިހާތަނަށް 500 މިލިއަން ރުފިޔާ ދައްކާ ނިންމާފައިވާ ކަމަށް އޭނާ ވިދާޅުވި އެވެ.

މިނިސްޓަރު ޝިޔާމް އިތުރަށް ފާހަގަކުރެއްވި ގޮތުގައި، ރައީސް މުއިއްޒުގެ ރިޔާސީ ވައުދެއް ކަމަށްވާ މަސް ކިރުވާތާ 48 ގަޑިއިރުގެ ތެރޭގައި ފައިސާ ދިނުމުގެ މަސައްކަތް މިހާރު ވަނީ ފަށާފައެވެ. މިކަން ފެށިފައިވަނީ މިދިޔަ މަސްވެރިންގެ ދުވަހުން ފެށިގެން ކަމަށް އޭނާ ވިދާޅުވި އެވެ.