ލޭބަރ ފޯސް ސާރވޭގައި ހިލޭ ސާބަހަށް ކުރާ މަސައްކަތްތައް ހިމެނިގެންދާނެ: ޝަހުދާ
23 އޭޕްރީލު 2025 - 16:49

މޯލްޑިވްސް ބިއުރޯ އޮފް ސްޓެޓިސްޓިކްސް އިން މިހާރު ކުރިއަށްގެންދާ ލޭބަރ ފޯސް ސާރވޭގައި ހިލޭ ސާބަހަށް ކުރާ މަސައްކަތްތައް ވަރަށް ބޮޑަށް ހިމެނިގެންދާނެ ކަމަށް މޯލްޑިވްސް ބިއުރޯ އޮފް ސްޓެޓިސްޓިކްސްގެ ޑެޕިއުޓީ ޗީފް ސްޓެޓިސްޓީޝަން، ޢާއިޝަތު ޝަހުދާ ވިދާޅުވެއްޖެއެވެ.
"މެންދުރު ޓީވީ" ގެ މައުޟޫޢު ޕުރޮގުރާމުގައި ވާހަކަދައްކަވަމުން ޝަހުދާ ވިދާޅުވީ، ސާރވޭގައި ހިމަނާފައިވާނީ އެކި ގޮތްގޮތަށް ލޭބަރ ފޯސް ބަހަން ބޭނުންވާ މަޢުލޫމާތު ކަމަށާއި، ހިލޭ ސާބަހަށް ކުރާ މަސައްކަތްތައް މި ފަހަރު ވަރަށް ބޮޑަށް ހިމެނިގެންދާނެ ކަމަށެވެ. މިއީ ދުނިޔޭގެ ފެންވަރުގައިވެސް ވަރަށް މުހިންމު މަޢުލޫމާތެއްކަން ފާހަގަކުރައްވައި ޝަހުދާ ވިދާޅުވީ މި ލެވެލް އަކަށް މިކަހަލަ މަޢުލޫމާތެއް މިހާތަނަށް ނަގާފައި ނުވާނެ ކަމުގައެވެ.

Ad by Hajj Corporation
މީގެ އިތުރުން، އާމްދަނީ ލިބޭ މަސައްކަތް ނުކުރެވޭ ގިނަ ފަރާތްތައް ތިބިކަން ފާހަގަކުރައްވައި ޝަހުދާ ވިދާޅުވީ، އަންހެނުން ގޭގައި ތިބުމުގެ ސަބަބުން ލޭބަރ މާކެޓުގައި ވަޒީފާ އަދާކުރުމުގައި ކޮންމެވެސް ވަރެއްގެ ގޮންޖެހުންތަކެއް ހުންނަ ކަމަށާއި، އެ ބޭފުޅުންގެ ވަގުތު ހޭދަކުރަނީ ކޮން ކަންތައްތަކެއްގައިތޯ ވެސް ސާރވޭގެ ތެރެއިން ދެނެގަންނާނެ ކަމަށެވެ.
"މިހާރު މި އޮންނަ ގޮތުން ވެއްޖެއްޔާ އާމްދަނީ ލިބޭ މަސައްކަތެއް ނުކުރިޔަސްވެސް އާމްދަނީ ނުކޮށްވެސް ގޭތެރޭގައި މިކުރާ މަސައްކަތްތައް، މިސާލަކަށް ދަރިން ބެލުމާއި، ގޭތެރޭގެ ކަންތައްތަކާއި އެ ކުރަންޖެހޭ ކަންތައްތަކުގައި އުޅޭ ވަގުތަށް މި ވަނީ ވަރަށް ޕްރޮޑަކްޓިވް މަސައްކަތެއްގެ ގޮތުގައި"
ޝަހުދާ ވިދާޅުވީ ސާރވޭގެ ތެރެއިން ޕްރޮޑަކްޓިވް އަދި ޕްރޮޑަކްޓިވް ނޫން މަސައްކަތްތަކަށްވެސް ބަލާލާނެ ކަމަށެވެ.
މި އެޕްރީލް މަހުގެ 20 އިން 26 އަށް މާލެ ސަރަހައްދުގައި އެމް.ބީ.އެސް ކުރިއަށް މި ގެންދާ ލޭބަރ ފޯސް ސާރވޭގެ މައިގަނޑު މަޤުޞަދުތަކުގެ ތެރޭގައި އިޤުތިޞާދީ ގޮތުން ހަރަކާތްތެރިވާ އާބާދީ ދެނެގަތުމާއި، ލޭބަރ ފޯސް ޕާޓިސިޕޭޝަން ރޭޓް ދެނެގަތުމާއި، އަލަށް ވަޒީފާ އުފެދޭވަރު ދެނެގަތުމުގެ އިތުރުން އެމްޕްލޮއިމަންޓް އަދި އަންއެމްޕްލޮއިމަންޓް ރޭޓް ދެނެގަތުން ހިމެނެއެވެ.
މީގެ އިތުރުން ހިޖުރަކުރުމުގެ ރޭޓު ހޯދައި އާބާދީގެ ޕްރޮޖެކްޝަންސްތައް އަދާހަމަކުރުމަށް ބޭނުންވާ ޑޭޓާ ހޯދުމާއި، "ޑީސެންޓް ޖޮބްސް އިންޑިކޭޓަރ" އެކުލަވާލުމަށް ބޭނުންވާ ޑޭޓާ ހޯދުން އަދި ދެމެހެއްޓެނިވި ތަރައްޤީގެ ލަނޑުދަނޑިތައް ހާސިލުވާ މިންވަރު ދެނެގަތުމަކީވެސް މި ސާރވޭގެ މަޤުޞަދުތަކުގެ ތެރޭގައި ހިމެނޭ ކަންތައްތަކެވެ.