ވޮލީބޯލް އެސޯސިއޭޝަން އޮފް މޯލްޑިވްސް (ވިއޭއެމް) އިން އިންތިޒާމުކޮށްގެން ކުރިއަށްގެންދާ ގައުމީ ވޮލީބޯލް ލީގު 2025ގެ އަންހެން ޑިވިޝަންގައި ހުރާ ކޮމިއުނިޓީ ކުލަބުން ފްލެކްސަރ ސްޕޯޓްސްގެ މައްޗަށް ކުރިހޯދައިފިއެވެ.

ސޯޝަލް ސެންޓަރުގައި ކުޅުނު މި މެޗުގައި ހުރާ ކޮމިއުނިޓީ ކުލަބުން ވަނީ 3-1 ސެޓުން މޮޅުވެފައެވެ. ފޯރިގަދަ މި މެޗުގެ ފުރަތަމަ ސެޓު ހުރާ ކޮމިއުނިޓީ ކުލަބުން ކާމިޔާބުކުރީ 25-18 އިންނެވެ. ނަމަވެސް ދެވަނަ ސެޓުގައި ފްލެކްސަރ އިން ވަނީ ކުޅުން ރަނގަޅުކޮށް 25-21 އިން ކާމިޔާބުކޮށްފައެވެ. ދެވަނަ ސެޓު ގެއްލުމަށްފަހު ހުރާ ކޮމިއުނިޓީ ކުލަބުން ވަނީ ކުޅުމުގެ ފެންވަރު އިތުރަށް މަތިކޮށް، ޖެހިގެން އައި ދެ ސެޓުގައިވެސް ފްލެކްސަރގެ މައްޗަށް އިސްކަން ހޯދާފައެވެ. މިގޮތުން ތިންވަނަ ސެޓު 25-21 އިން އަދި ހަތަރުވަނަ ސެޓު 25-18 އިން ހުރާ ކޮމިއުނިޓީ ކުލަބުން ކާމިޔާބުކުރިއެވެ.

މެޗުގެ އެންމެ މޮޅު ކުޅުންތެރިޔާގެ މަގާމަށް ހޮވުނީ ހުރާ ކޮމިއުނިޓީ ކުލަބުގެ ޖާރސީ ނަންބަރު 4 ގެ ވެރޯނިކާ ޒުބަރެވާ އެވެ.

މީގެ އިތުރުން އިއްޔެ ހަވީރުވެމްކޯއިން ވަނީ ގުޑްގޭމްސް އެކަޑެމީ ސީދާ ތިންސެޓުން ބަލިކޮށް މެޗު ކާމިޔާބުކޮށްފައެވެ.

މިމުބާރާތުގައި މިއަދު ހަވީރު ޕޮލިސް ކުލަބާއި ހުރާ ބައްދަލުކުރާއިރު، މިރޭ ފްލެކްސަރ ނިކުންނާނީ ސިޓީ ފްރެންޑްސް އާއި ދެކޮޅަށެވެ.