ފިނިހަކަ ދުވެލީގައި ކުރީސަރުކާރުން ކުރިޔަށް ގެންދިޔަ މުލީ އެއާޕޯރޓްގެ މަސައްކަތް މި ސަރުކާރުން ނިންމާލީ ރައީސް ޑރ. މުހައްމަދު މުއިއްޒު އެ މަސައްކަތަށް ދެއްވި ސަމާލުކަމުގެ ސަބަބުން ކަމަށް ރީޖަނަލް އެއާޕޯޓްސް ކޮމްޕެނީގެ މެނޭޖިންގް ޑިރެކްޓަރ އަހުމަދު މުބީން ވިދާޅުވެއްޖެ އެވެ.

މުލީ އެއާޕޯޓުގެ މަސައްކަތް ނިންމާ މިއަދު ޓެސްޓު ފްލައިޓު ޖެއްސުމާ ގުޅިގެން މުބީން ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ އަންނަ މެއި މަހުގެ. 1 ވަނަ ދުވަހު ދިވެހިރާއްޖޭގެ ރައީސުލްޖުމްހޫރިއްޔާ މުލީ އެއާޕޯރޓް ހުޅުވައިދެއްވާނެ ކަމަށެވެ.

ހުއްޓެމުން، މަޑުޖެހެމުން، ފިނިހަކަ ދުވެލީގައި ކުރީސަރުކާރުން ކުރިޔަށް ގެންދިޔަ މުލީ އެއާޕޯރޓްގެ މަސައްކަތް ކާމިޔާބުކަމާއި އެކު ނިންމާލައި މިއަދު ޓެސްޓު ފުލައިޓް ޖެއްސުނީ އަދުގެ ރައީސުލްޖުމްހޫރިއްޔާ ދެއްވެވި އިރުޝާދުފުޅާއި އެމަނިކުފާނު މި މަސައްކަތަށް ބެހެއްޓެވި ސަމާލުކަމެއްގެ ސަބަބުން. ކަމަށް މުބީން ވިދާޅުވި އެވެ.

އެމްޑީޕީގެ ސަރުކާރުން 2021 ވަނަ އަހަރު އަމަލީ މަސައްކަތް ފެށި މުލީ އެއާޕޯޓުގެ މަސައްކަތް މި ސަރުކާރު އައުމާ ހަމަޔަށްވެސް އޮތީ އެކި ސަބަބުތަކާ ހުރެ ކުރިއަށް ނުގޮސް މަޑުޖެހިފަ އެވެ.

މުލީ އެއާޕޯޓް ތަރައްޤީ ކުރުމުގެ މަޝްރޫޢު ނިމުމާއެކު، މިއަދު ވަނީ ޓެސްޓް ފްލައިޓް ޖައްސާފައެވެ. މިއީ މ. އަތޮޅުގެ ފުރަތަމަ އެއަރޕޯޓެވެ. ޓްސްޓު ފްލައިޓްގެ ގޮތުގައި މުލީ އެއަޕޯޓަށް ޖައްސާފައި މިވަނީ ޤައުމީ އެއަލައިން، މޯލްޑިވިއަންގެ ޑޭޝް-8 މަރުކާގެ ބޯޓެކެވެ.

މުލީ އެއަރޕޯޓުގެ މަޝްރޫޢު ކުރިއަށް ގެންދިއުމަށް އެރަށުން 36 ހެކްޓަރުގެ ބިމެއް ވަނީ ހިއްކާފަ އެވެ. އަދި އެއާޕޯޓުގައި 1500 މީޓަރުގެ ރަންވޭއެއް ވަނީ ހަދާފަ އެވެ.

މި މަޝްރޫޢު ކުރިއަށްގެންދިޔައީ އެމްޓީސީސީއާއި ހަވާލުކޮށްގެންނެވެ.މުލީގައި އެއަޕޯޓް ތަރައްޤީކުރުމަށް ސަރުކާރުން 300މިލިއަނަށްވުރެ ގިނަ ރުފިޔާ ހޭދަކުރިއެވެ.ވައިގެ ދަތުރުފަތުގެ ޚިދުމަތް މުލަކު އަތޮޅުގައި، ޚާއްސަކޮށް ވެރިކަން ކުރާ މުލީގައި ޤާއިމްކުރި އެއަރޕޯޓާއެކު ފެށިގެންދާތީ އެރަށުގެ ރައްޔިތުންވަނީ އެކަމުގެ އުފާވެރި ޝުޢޫރު ފާޅުކޮށްފައެވެ. ފްލައިޓަށް މަރުޙަބާ ކިއުމަށް ރައްޔިތުން ފަރިވަޅެއްވެސް އަރުވާފައިވެއެވެ.