ހުޅުމާލޭގެ ދެވަނަ ފިޔަވަހީގައި ހުރި ވިނަރެސް ޓަވަރެއްގެ ފްލެޓަކުން އަންހެނަކު ރޯ އަޑު އިވޭކަމަށް ލިބުނު ރިޕޯޓަކާއި ގުޅިގެން ފުލުހުން އެތަނަށް ގޮސް ބެލިއިރު، އެމީހާ ޚަބަރު ހުސްވެފައި އޮއްވާ ފެނިއްޖެއެވެ.

ފުލުހުންގެ ޚިދުމަތުން މީޑިއާތަކަށް ދިން މައުލޫމާތުގައި ބުނެފައިވަނީ، މިއަދު ހެނދުނު 6:05 ހާއިރު ވިނަރެސް ޓަވަރެއްގެ އެޕާޓްމަންޓަކުން އަންހެނަކު ރޯ އަޑުއިވޭކަމަށް ލިބުނު ރިޕޯޓަކާއި ގުޅިގެން ފުލުހުން ވަގުތުން އެތަނަށް ގޮސްފައިވާ ކަމަށެވެ.

މިގޮތުން ފުލުހުން އެ އެޕާޓްމަންޓަށް ގަދަކަމުން ވަދެ ބެލިއިރު، 21 އަހަރުގެ ދިވެހި އަންހެނަކު ޚަބަރު ހުސްވެފައި އޮއްވާ ފެނުނު ކަމަށް ފުލުހުން ބުނެފައިވެއެވެ.

ފުލުހުންގެ ޚިދުމަތުން އިތުރަށް ބުނެފައިވަނީ، މި ހާދިސާ ހިނގުމާ ގުޅިގެން އެ އަންހެން މީހާ ވަނީ ހުޅުމާލެ ހޮސްޕިޓަލަށް ގެންގޮސްފައި ކަމަށާއި، މި ވަގުތު އޭނާއަށް ފަރުވާ ދެމުން އަންނަ ކަމަށެވެ.

ނަމަވެސް، މި މައްސަލައާ ގުޅޭ އިތުރު ތަފްސީލެއް ފުލުހުން ހާމަކޮށްފައެއް ނުވެއެވެ.

އެ އެޕާޓްމަންޓްގައި އެވަގުތު ޢާއިލާގެ މެމްބަރުން ވެސް ތިބިކަމަށް ފުލުހުން ވަނީ ބުނެފައެވެ.