އިނގިރޭސި ޕްރީމިއަރ ލީގު ދޫކޮށްލިގޮތަށް ޗެންޕިއަންސް ލީގު ދޫކޮށްލުމަށް އާރސެނަލް އިން ތައްޔާރުވެއްޖެއެވެ. މިސީޒަނުގެ ޗެންޕިއަންސް ލީގު ފިޔަވައި ހުރިހާ މުބާރާތަކުން ވަކިވެފައިވާ އާރސެނަލްގެ އަމިއްލަ ދަނޑުގައި ކުޅުނު ސެމީ ފައިނަލުގެ ފުރަތަމަ ލެގުގައި ޕީއެސްޖީ އިން ވަނީ މޮޅުކުޅުމެއް ކުޅެ، އާރސެނަލް ބަލިކޮށްފައެވެ.

ސެމީ ފައިނަލް ފުރަތަމަ ލެގުގައި ރޭ އާރސެނަލްއާ ދެކޮޅަށް ކުޅުނު މެޗު ޕީއެސްޖީން ވަނީ 1-0 ގެ ނަތީޖާއަކުން ކާމިޔާބުކޮށްފައެވެ. ލަންޑަނުގެ އެމިރޭޓްސް ސްޓޭޑިއަމްގައި ކުޅުނު މި މެޗުގައި ޕީއެސްޖީގެ ލަނޑު ޖެހީ މެޗުގެ ހަތަރުވަނަ މިނިޓުގައި އުސްމާން ޑެމްބެލޭއެވެ.

ކްވިޗާ ކްވަރަޓްސްކޭލިއާ ދިން ޕާހަކުން ޑެމްބެލޭ ޖެހި މި ލަނޑަކީ މި ސީޒަނުގެ ޗެމްޕިއަންސް ލީގުގައި އޭނާ ކާމިޔާބުކުރި އަށްވަނަ ލަނޑެވެ. މެޗުގެ ފުރަތަމަ ހާފުގައި ޕީއެސްޖީން ދެއްކި މޮޅު ކުޅުމުގައި އާސެނަލްގެ ގޯލަށް ނުރައްކާތެރި ގިނަ ހަމަލަތަކެއް ފޮނުވާލިއެވެ.

ޕީއެސްޖީގެ ގޯލްކީޕަރު ޖިއާންލުއިޖީ ޑޮންނަރޫމާ ވަނީ މި މެޗުގައި އާސެނަލްގެ ގިނަ ހަމަލަތަކެއް ދިފާއުކޮށްފައެވެ. އޭގެ ތެރޭގައި ގެބްރިއެލް މާޓިނޭލީ އާއި ލިއަންދްރޯ ޓްރޮސާޑު ފޮނުވާލި ނުރައްކާތެރި ހަމަލަތައް ހިމެނެއެވެ. މެޗުގެ ތެރޭގައި އާސެނަލްއަށް ލިބުނު ހިލޭ ޖެހުމަކުން މިކެލް މެރީނޯ ޖެހި ލަނޑު އޮފްސައިޑްގެ ސަބަބުން ވަނީ ބާތިލުކޮށްފައެވެ.

ރޭގެ މެޗުގައި އާރސެނަލް އަށް ގިނަ ސެޓްޕީސްތަކެއް ލިބުނު ނަމަވެސް އެކަން ކާމިޔާބުވާގޮތެއް ނުވިއެވެ.

މެޗުގެ ދެވަނަ ހާފުގައި ޕީއެސްޖީއަށް ލީޑު ފުޅާކުރުމަށް ރަނގަޅު ފުރުސަތުތަކެއް ލިބުނެވެ. ނަމަވެސް ބްރޭޑްލީ ބާކޯލާ އާއި ގޮންސާލޯ ރާމޯސްގެ ހަމަލަތައް ގޯލުގެ ދަނޑީގައި ޖެހި ބޭރުވިއެވެ.

ފުރަތަމަ ފަހަރަށް ޗެމްޕިއަންސް ލީގު ކާމިޔާބުކުރުމަށް މަސައްކަތްކުރަމުންދާ ޕީއެސްޖީ އާއި އާސެނަލްގެ ދެވަނަ ލެގުގެ މެޗު އޮންނާނީ އަންނަ ހަފުތާގައި ފްރާންސްގެ ޕެރިހުގައި ޕީއެސްޖީގެ ދަނޑުގައެވެ.