ޒަކިއްޔާގެ ދަރިންގެ އިލްތިމާޞް: "ހެއްކެއް ނެތި ބައްޕަގެ ބޮލުގައި ތުޙުމަތު ނާޅުވާ"
30 އޭޕްރީލު 2025 - 09:35
އެކަށީގެންވާ ސާބިތު ހެކި ނެތި މަންމަ (ޒަކިއްޔާ)ގެ މަރުގެ ތުޙުމަތު ވަކި މީހެއްގެ ބޮލުގައި ނޭޅުވުމަށް ޒަކިއްޔާގެ ދަރިން އިލްތިމާޞްކޮށްފިއެވެ.
ޒަކިއްޔާގެ ދަރިންގެ ފަރާތުން މިއަދު ސޯޝަލް މީޑިޔާގައި އާއްމުކޮށްފައިވާ ބަޔާނެއްގައި ބުނެފައިވަނީ އެއްވެސް ހެއްކެއް، ހަޤީޤަތެއް ނެތި ވަކި މީހެއްގެ ބޮލުގައި މަންމަގެ (ޒަކިއްޔާ) މަރުގެ ތުޙުމަތު އެޅުވުމަކީ ބަލައިގަނެވޭނެ ކަމެއް ނޫން ކަމަށާއި، ވަކި މީހަކާ ދިމާކޮށް ބިރު ދައްކާ އިންޒާރު ދިނުމަކީ ވަރަށް ފިނޑި ޢަމަލެއް ކަމަށެވެ.
Ad by Hajj Corporation
"ރަށުގެ އަމަން އަމާން ކަން ނަގާލާ ފިތުނަވެރި ބިރުވެރި ތަނަކަށް ވެއްޓެން ޖެހުމުގެ އަސްލަކީ މިއަދު މަގުމަށްޗަށް ނިކުމެ ފާޅުގައާއި ސިއްރިޔާތުގަ އިންސާފުގެ ނަމުގަ މަސައްކަތް ކުރާ ވަކިބަޔެއްގެ ސަބަބުން. އާދޭހަކީ އަހަރުމެންގެވެސް އުފަން ރަށުގަ މިނިވަންކަންމަތީ ގޭ ބޭރު ޖޯލިފައްޗަށާއި ބޭރުތެރޭ އުޅޭ ގަޑިއަކީ މީހެއް ދިމާކޮށްދާނެ ފަދަ ބިރުވެރި ގަޑި އަކަށް ނުހެދުން" - ބަޔާނުގައި ބުނެފައިވެއެވެ.
މީގެ އިތުރުން މަންމަގެ މަރަށް އިންސާފު ބޭނުންވާ ކަމަށާއި އިތުރު އެހެން ބަޔަކު ނޭދޭ ވަރަށް އެކަމަށް އާއިލާއިން އެދޭ ކަމަށް ޒަކިއްޔާގެ ދަރިން ވަނީ ބުނެފައެވެ.
ޒަކިއްޔާގެ ދޮށީ ދަރި އަލީ ރިމްޒީ އާއްމުކޮށްފައިވާ ބަޔާން
އެކަމާ ގުޅިގެން ފުލުހުން ބޭއްވި ނޫސްވެރިންގެ ބައްދަލުވުމުގައި ޗީފް އިންސްޕެކްޓާ އޮފް ޕޮލިސް މުހައްމަދު ސާމިހު ވިދާޅުވީ ޑޮކްޓަރުގެ ބަހުން ޒަކިއްޔާ މަރުވާން ދިމާވި ސަބަބެއްގެ ގޮތުގައި ފާހަގަކޮށްފައި ވަނީ ކަރަށް ލިބިފައިވާ ޒަޚަމްތަކުގެ ސަބަބުންކަން އެނގޭ ކަމަށެވެ. އެހެންނަމަވެސް މިހާތަނަށް އޭނާ މަރާލިކަމުގެ އެއްވެސް ހެއްކެއް ތަހުގީގަށް ފާހަގަކުރެވިފައި ނެތް ކަމަށް ސާމިހު ވިދާޅުވިއެވެ.
