އިސްލާމީ ކަންތައްތަކާބެހޭ ވުޒާރާގެ ވަޒީރު ޑރ. މުޙައްމަދު ޝަހީމް ޢަލީ ސައީދު، އަދާލަތު ޕާޓީއާ އަލުން ގުޅިވަޑައިގަތުމަށް ނިންމަވައި، މިއަދު ރަސްމީކޮށް އިޢުލާނު ކުރައްވައިފިއެވެ.

އެކްސް ގައި ކުރެއްވި ޕޯސްޓެއްގައި މިކަން ހާމަކުރަށްވައި، ޝަހީމް ވިދާޅުވީ، "އެ ޕާޓީގެ ސީނިއަރ އެއް މުއައްސިސްގެ ހައިސިއްޔަތުން އަހަރުތަކެއް ވަންދެން އަޅުގަނޑު ޚިދުމަތްކުރި އަދާލަތު ޕާޓީއަށް އަލުން ވަނުމަށް ނިންމައިފީމެވެ. މިއަހަރު ފަހުކޮޅުގައި ޕާޓީގެ އާ ރައީސަކު ހޮވުމަށް ބާއްވާ އެތެރޭގެ އިންތިޚާބުގައި އަޅުގަނޑު ވާދަކުރާނަން، އިންޝާ ﷲ." މިއެވެ.

ޝަހީމްގެ މި ނިންމެވުމާއި ގުޅިގެން، އަދާލަތުގެ މިހާރުގެ ރައީސް، އެމްޑީޕީގެ ސަރުކާރުގެ ހޯމް މިނިސްޓަރު އިމްރާން ވަނީ ވަރަށް ބޮޑަށް ކަންބޮޑުވުން އޮތް މޭރުމަކުން އެކްސްގައި ޕޯސްޓެއް ކުރަށްވާފައެވެ. އެ ޕޯސްޓްގައި ވަނީ ޝަހީމް ވަޒީރުކަމުން އިސްތިއުފާދެއްވުމަށްފަހު އަދާލަތާއި ގުޅުމަށް އެދިފައެވެ. ނަމަވެސް އެއީ އަދާލަތުގެ ހިންގާ ގަވާއިދު ދަންނަ ހަމައެއްނޫނެވެ.

ޝަހީމްގެ މި ނިންމެވުމަށް އަދާލަތު ޕާޓީގެ ގިނަ އިސް މެންބަރުންނާއި ޢިލްމުވެރިން ވަނީ މަރުޙަބާ ކިޔައި، ތާއީދު ފާޅުކުރައްވާފައެވެ. މިކަމުން ދޭހަވަނީ ޕާޓީގެ އެތެރޭގައި ޝަހީމަށް ބޮޑު ތާއީދެއް އޮތްކަމެވެ. އިމްރާން މި މިންވަރަށް ކަންބޮޑުވެވަޑައިގަތީ އެހެންވެކަމަށްބެލެވެއެވެ.

ބެންކޮށްގައި މިހާރު ދިރިއުޅުއްވާ އިމްރާނަކީ މިވަގުތު ރާއްޖޭގެ ސިޔާސީ މަޝްރަހްގައި ''އައުޓް ޑޭޓެޑް'' ޕްރޮޑަކްޓެއް ގޮތުގައި ބެލެވޭއިރު، ޝަހީމަށް މިލިބޭ ތާއީދު ދައްކުވައި ދެނީ އިމްރާނަށް އަމިއްލަ ޕާޓީގެ ތެރޭގައި ވެސް މާބޮޑު ތާއީދެއް ނެތްކަމެވެ.