ޕޯޗުގީޒް ސުޕަރ ސްޓަރ ކްރިސްޓިއާނޯ ރޮނާލްޑޯގެ ޓީމު އަލް-ނަސްރު، އޭއެފްސީ ޗެމްޕިއަންސް ލީގުގެ ސެމީ ފައިނަލުން ބަލިވެ މުބާރާތުން ކަޓައިފިއެވެ. ޖަޕާނުގެ ކަވަސަކީ ފްރޮންޓާލޭ އާ ދެކޮޅަށް ކުޅުނު މެޗުން އަލް-ނަސްރު ބަލިވީ 3-2 އިންނެވެ.

މިއާއެކު މިސީޒަނުގައި އަލް-ނަޞްރު އަށް މިހާރު ބާކީ އޮތީ ލީގު އެކަންޏެވެ. ސަޢޫދީ ލީގުގައި އަލް ނަޞްރު މިވަގުތު 3 ވަނައިގައި އޮތްއިރު، އެއްވަނައިގައިވާ އިއްތިހާދާއި ދެމެދު މިވަގުތު 8 ޕޮއިންޓުގެ ފަރަގެއްވެއެވެ. ލީގުގައި ބާކީ 6 މެޗު އޮތްއިރު، މިހާރުގެ އަލް-ނަޞްރުގެ ފޯމުގައި ލީގު ހޯދުމަކީ ނާދިރުކަމެކެވެ. މިއާއެކު ރޮނާލްޑޯ ވަނީ ޖެހިޖެހިގެން 2 ސީޒަން އެއްވެސް ތައްޓެއް ނުލިބި ނިންމާލަން ޖެހިދާނެކަމުގެ ބިރު ހީވެފައެވެ.

ރޭގެ މެޗުގެ ފަހު ވަގުތުތަކުގައި ލިބުނު ތިން ގޯލު ޖެހުމުގެ ފުރުސަތު، އޭގެ ތެރޭގައި ދެ ފްރީކިކް ހިމެނޭ ގޮތަށް، ރޮނާލްޑޯއަށް ބޭކާރުކޮށްލިއެވެ. އަދި ފުރަތަމަ ހާފުގައި އޭނާ ޖެހި ވަރުގަދަ ޝޮޓެއް ވަނީ ގޯލު ޕޯސްޓުގައި ޖެހިފައެވެ.

މި ބަލިވުމަށްފަހު ނޫސްވެރިންނާއި ވާހަކަ ދައްކަމުން ރޮނާލްޑޯ ބުނެފައިވަނީ އަލް-ނަޞްރު ރޭގެ މެޗުގައި މޮޅަށް ކުލުނު ކަމަށާއި، އަލް-ނަޞްރުގެ ސަޕޯޓަރުންނަށް ކާމިޔާބީ ހައްޤުކަމަށެވެ.

40 އަހަރުގެ ރޮނާލްޑޯ މިހާރު މަސައްކަތް ކުރަމުންގެންދަނީ ފުޓްބޯޅައިގައި ފުރަތަމަ 1000 ގޯލު ޖެހި ކުޅުންތެރިޔާގެ މަޤާމް ހޯދާށެވެ. އެގޮތުން އޭނާގެ ކެރިއަރުގައި މިހާތަނަށް 934 ގޯލު ޖަހާފައިވެއެވެ.