ޔޫރޮޕާ ލީގުގެ ސެމީ ފައިނަލުގެ ފުރަތަމަ ލެގުގައި ރޭ ނޯވޭގެ ބޯޑޯ/ގްލިމް އާ ދެކޮޅަށް ކުޅުނު މެޗުން ޓޮޓްނަމް ހޮޓްސްޕަރ ވަނީ 3-1 ގެ ނަތީޖާއަކުން މޮޅުވެ, ޔޫރޮޕާ ލީގުގެ ފައިނަލުގައި އިނގިރޭސިވިލާތުގެ ދެ ޓީމު ބައްދަލުކުރުމުގެ ފުރުސަތު ވަނީ ވަރަށް ބޮޑުވެފައެވެ.

ޓޮޓްނަމްގެ ދަނޑުގައި ކުޅުނު މެޗުގެ ފުރަތަމަ މިނެޓުގައި އެ ޓީމަށް ކުރި ހޯދައިދިނީ ބްރެނަން ޖޯންސަންއެވެ. ރިޗާލިސަން ދިން ބޯޅައެއް ބޮލުން ޖަހައި ގޯލުގެ ތެރެއަށް ފޮނުވާލައިގެން އޭނާ މި ލަނޑު ކާމިޔާބުކުރިއެވެ. މެޗުގެ 34 ވަނަ މިނެޓުގައި ޖޭމްސް މެޑިސަން ވަނީ ޓޮޓްނަމްގެ ދެވަނަ ލަނޑު ޖަހާފައެވެ.

Ad by Hajj Corporation

2008 ވަނަ އަހަރަށްފަހު ފުރަތަމަ ފަހަރަށް މުބާރާތެއް ކާމިޔާބުކުރުމަށް މަސައްކަތްކުރަމުންދާ ޓޮޓްނަމްގެ ތިންވަނަ ލަނޑު ޖެހީ މެޗުގެ 61 ވަނަ މިނެޓުގައި ޑޮމިނިކް ސޮލާންކޭއެވެ. އެއީ އެ ޓީމަށް ލިބުނު ޕެނަލްޓީއަކުންނެވެ.

ބޯޑޯ/ގްލިމްގެ ހަމައެކަނި ލަނޑު ޖެހީ މެޗުގެ ފުރިހަމަ ވަގުތު ހަމަވާން ހަތް މިނެޓަށް ވެފައި އޮއްވައެވެ. މެޗު ނިމުނީ 3-1 އިންނެވެ.

މިމޮޅުވުމާއެކު އިނގިރޭސި ލީގުގެ 17 ވަނައިގައި އޮތް ޓޮޓްނަމް އަށްވެސް މުބާރާތް ކާމިޔާބުކޮށްގެން ޗެންޕިއަންސް ލީގަށް ކޮލިފައި ވުމުގެ ފުރުސަތު ވަނީ ފަހިވެފައެވެ.