ކޮންފަރެންސް ލީގުގެ ސެމީ ފައިނަލްގެ ފުރަތަމަ ލެގުގައި ސްވިޑަންގެ ޖިއޯގާޑަން އާއި ދެކޮޅަށް ޗެލްސީ ކުޅުނު މެޗު 4-1 ގެ ނަތީޖާއަކުން ކާމިޔާބުކޮށް، މުބާރާތުގެ ފައިނަލަށް ދިއުމާއި ގާތަށް ޗެލްސީ ޖެހިލައިފިއެވެ. މިއާއެކު ޔުއޭފާ އިން ކުލަބުތަކަށް އަމާޒުކޮށްގެން ބާއްވާ ތިން މުބާރާތް ކާމިޔާބުކުރި ފުރަތަމަ ޓީމަށްވުމުގެ ފުރުސަތު ޗެލްސީއަށް ވަނީ ލިބިގެންގޮސްފައެވެ. ޗެލްސީއިން މީގެކުރިން ޗެންޕިއަންސް ލީގު 2012 އަދި 2021 ވަނަ އަހަރު ކާމިޔާބުކޮށްފައިވާއިރު، 2013 ވަނަ އަހަރުގައި ޗެލްސީވަނީ ޔޫރޮޕާ ލީގު ނަގާފައެވެ. އެހެންކަމުން 2021 ވަނަ އަހަރު ޔުއޭފާ އިން އަލަށް ފެށި ކޮންފަރެންސް ލީގުގެ ތަށި ހޯދައިގެން ޔުއޭފާ ގެ ތިން މުބާރާތް ކާމިޔާބު ކުރި ހަމައެކަނި ޓީމުގެ ފުރުސަތަށް ވުމުގެ ޗެލްސީއަށް ވަނީ ލިބިފައެވެ.

ރޭގައި ރަށުން ބޭރުގައި ކުޅުނު މި މެޗުގައި ޗެލްސީގެ ފުރަތަމަ ލަނޑު 12 ވަނަ މިނެޓުގައި ޖަހާފައިވަނީ ޖޭޑަން ސަންޗޯއެވެ. އެންޒޯ ފެނާންޑޭޒްގެ ޕާހަކުން މި ލަނޑު ކާމިޔާބުކުރި އިރު، ފުރަތަމަ ހާފު ނިމުމުގެ ކުރިން ނޮނީ މަޑުއޭކޭ ވަނީ އިތުރު ލަނޑެއް ޖަހައި ޗެލްސީގެ ލީޑު 2-0 އަށް ބޮޑުކޮށްފައެވެ.

ދެވަނަ ހާފުގައި ކޯޗު އެންޒޯ މަރެސްކާ ގެނައި ބަދަލުތަކާއެކު ކުޅުމަށް އަރާފައިވާ ނިކޮލަސް ޖެކްސަން ވަނީ ދެ ލަނޑު ޖަހައި މެޗުގެ ނަތީޖާ 4-0 އަށް ގެންގޮސްފައެވެ. ޖިއޯގާޑަންގެ ހަމައެކަނި ލަނޑު 68 ވަނަ މިނެޓުގައި ޖަހާފައިވަނީ އަލެމަޔޭހޯއެވެ.