މިއަދު ހަމާސްއިން ވަނީ އިސްރާއީލުން ހުށަހަޅާފައިވާ ޣައްޒާއަށް އެހީ ފޯރުކޮށްދިނުމުގެ ޕްލޭން ބަލައިނުގަނެ އެއީ "ސިޔާސީ ބްލެކްމެއިލްގެ ވަސީލަތެއް" ކަމަށް ބުނެފައެވެ. އިސްރާއީލުން ހުށަހަޅާފައިވަނީ ބައިނަލްއަޤްވާމީ އެހީގެ އޭޖެންސީތައް މެދުވެރިނުކޮށް ސީދާ ޣައްޒާގެ އަސްކަރީ ސަރަހައްދުތަކަށް އެހީ ފޯރުކޮށްދިނުމަށެވެ.

ހަމާސްއިން ބުނެފައިވަނީ އެހީ ފޯރުކޮށްދޭންވާނީ ކަމާބެހޭ ބައިނަލްއަޤްވާމީ ނުވަތަ ސަރުކާރުގެ އިދާރާތަކުން ކަމަށެވެ. އދ އާއި އިންސާނީ އެހީގެ ޖަމާއަތްތަކުން ވަނީ އިސްރާއީލުގެ މި "ނުރައްކާތެރި" ޕްލޭން ކުށްވެރިކޮށް، އެއީ "އަސްކަރީ ސަރަހައްދުތަކަށް" "ރޭޝަން" ފޯރުކޮށްދިނުމުގެ ގޮތުން ހުށަހަޅާފައިވާ ކަމެއްކަމަށް ބުނެފައެވެ. މި ހުށަހެޅުން އައިސްފައިވަނީ އިސްރާއީލުން 9 ހަފްތާއަށް ވުރެ ގިނަ ދުވަހު ކާބޯތަކެތީގެ އެހީ ފޯރުކޮށްދިނުން ހުއްޓުވާލާފައިވަނިކޮށެވެ.

މި ދަނޑިވަޅުގައި، އިސްރާއީލުގެ އަސްކަރިއްޔާގެ އިސްވެރިޔާ އެޔަލް ޒަމީރު ވަނީ ޣައްޒާއަށް ކުރާ ހަމަލާތައް ފުޅާކުރުމަށް އެތައް ހާސް ރިޒާވިސްޓުންނަށް ގޮވާލާނެކަމަށް ބުނެފައެވެ.

އިސްރާއީލުގެ ހަނގުރާމައިގެ ސަބަބުން މިހާތަނަށް މަދުވެގެން 52,567 ފަލަސްތީނު ރައްޔިތުން މަރުވެ، 118,610 މީހުން ޒަޚަމްވެފައިވާކަމަށް ޣައްޒާގެ ސިއްހީ ވުޒާރާއިން ބުނެއެވެ. ނަމަވެސް ސަރުކާރުގެ މީޑިއާ އޮފީހުން މަރުވި މީހުންގެ އަދަދު 61,700 އަށް އަޕްޑޭޓްކޮށް، ސަތޭކަތަކުން މީހުން ވެއްޔާއި ސިމެންތިކޮޅުތަކުގެ ދަށުގައި ގެއްލިފައިވާކަމަށް ބުނެފައިވެއެވެ.