ޗައިނާއިން ދިވެހިރާއްޖެއަށް އަލަށް ކަނޑައެޅި ސަފީރު ކޮންގް ޝިއަންހުއާ މިއަދު ވަނީ އޭނާގެ މަޤާމުގެ ފަތްކޮޅު ރައީސުލްޖުމްހޫރިއްޔާ ޑރ. މުހައްމަދު މުޢިއްޒު އަށް އަރުވާފައެވެ.

މި ރަސްމިއްޔާތު އޮތީ މިއަދު ރައީސް އޮފީހުގައެވެ.

Ad by Hajj Corporation

ކޮންގް ޝިއަންހުއާ މި މަޤާމަށް އައްޔަންކޮށްފައި ވަނީ ކުރިން ހުންނެވި ސަފީރު ވަން ލިޒިންގެ ދައުރު ނިމުމާ ގުޅިގެންނެވެ. ވަން ލިޒިންގެ ދައުރު ހަމަވެފައިވަނީ މިދިޔަ އަހަރުގެ ޑިސެމްބަރު މަހުއެވެ.

ސަފީރުގެ ފަތްކޮޅު އެރުވުމަށްފަހު، ރައީސް މުޢިއްޒު ސަފީރު ކޮންގް ޝިއަންހުއާ ވަނީ މުހިންމު މަޝްވަރާތަކެއް ކުރައްވާފައެވެ.

ރައީސް އޮފީހުން މަޢުލޫމާތު ދެއްވާފައިވާ ގޮތުގައި، މި މަޝްވަރާތަކުގައި ދެ ޤައުމުގެ ގުޅުން އިތުރަށް ހަރުދަނާކުރުމާއި، ރާއްޖޭގެ ތަރައްޤީގެ މަޝްރޫޢުތަކަށް ޗައިނާއިން އެހީތެރިކަން ފޯރުކޮށްދިނުމާ ގުޅޭ ގޮތުން ވާހަކަދެކެވުނެވެ.

މި ބައްދަލުވުމުގައި ރައީސް މުޢިއްޒު ވަނީ ދެ ޤައުމުގެ ދެމެދުގައި އޮތް ދެމެހެއްޓެނިވި އަދި ރަޙްމަތްތެރި ގުޅުމަށް އިޝާރާތްކުރައްވައި، އާ ސަފީރުގެ ދައުރުގައި މި ގުޅުން އިތުރަށް ފުޅާވެގެންދާނެ ކަމުގެ އުންމީދު ފާޅުކުރައްވާފައެވެ.

އާ ސަފީރު ކޮންގް ޝިއަންހުއާ ވެސް ވަނީ ދެ ޤައުމުގެ ދެމެދުގައި އޮތް ގުޅުން އިތުރަށް ވަރުގަދަކުރުމަށް މަސައްކަތްކުރައްވާނެ ކަމުގެ ޔަޤީންކަން ދެއްވާފައެވެ. އަދި ރާއްޖޭގެ ތަރައްޤީއަށް ޗައިނާއިން ކުރަމުންދާ އެހީތެރިކަން ކުރިއަށް އޮތް ތަނުގައި ވެސް ދެމެހެއްޓޭނެ ކަމަށް ވިދާޅުވެފައިވެއެވެ.