އެފް.އޭ.އެމް ފުޓްބޯޅަ ލީގަށް ނިއުރޭޑިއަންޓް ސްޕޯރޓްސް ކުލަބު ޓީމު އެކުލަވާލައިގެން މަސައްކަތް ފެށީ މީގެ ހަފްތާއެއް ކުރިންނެވެ. އެގޮތުން ޓީމުގެ ކުޅުންތެރިން އިޢުލާނު ކުރެވި ޕްރެކްޓިސް ފެށިގެންދިޔައީ މިމަހުގެ 3 ވަނަ ދުވަހުގައެވެ. ޓީމަށް މެނޭޖަރެއް ހަމަޖެހުނުތާ ވީ ދެތިންދުވަހެވެ. ޖުމްލަ 2 ޕްރެކްޓިސް އާއެކު ރާއްޖޭގެ އެންމެ ތަޖުރިބާކާރު، ޤައުމީ ޓީމުގެ 15 ކުޅުންތެރިންނާއި ދެކޮޅަށް ނިކުތްއިރު ގިނަބައެއްގެ ހިތުގެ ތެރޭގައި އޮތީ އެންމެ ސުޥާލެކެވެ. މިވަރުގެ ތަޖުރިބާކާރު ޓީމަކުން އިއްޔެ މެންދުރު އެކުލަވާލި ޓީމަކާއި ދެކޮޅަށް ގޯލު ފުންޏެއް އޮއްސާލާނެކަމަށް ގިނަބަޔަކު އަންދާޒާކުރިއެވެ.

Ad by Hajj Corporation

ނަމަވެސް އިއްޔެ ހަވީރު ފެނިގެންދިޔައީ ނިއުރޭޑިއަންޓް ގެ ކުޅުންތެރިންގެ އާދަޔާ ޚިޔާފު ހިތްވަރެކެވެ. މެޗު ފެށިގެން 5 މިނެޓު ތެރޭގައި މާޒިޔާއިން ގޯލުޖެހިނަމަވެސް ފުރަތަނަ ހާފު ނިމުމާއި ހަމައަށް ނިއުރޭޑިއަންޓުގެ ކުޅުންތެރިންގެ ފަރާތުން އެދެވޭ ރަނގަޅު ކުޅުމެއް ފެނިގެންދިޔައެވެ. އިއްޔެގެ މެޗު 5-1 އިން ނިމިގެންދިޔަސް ނިއުރޭޑިއަންޓް ކުޅުންތެރިންގެ ފަރާތުން ފެނިގެންދިޔަ ހިތްވަރާ ސަޕޯޓަރުންނަށް ދެއްވި އުއްމީދަށް ތަޢުރީފު ޙައްޤެވެ.

ރާއްޖޭގެ ފުޓްބޯޅައިގެ ރަސްގެފާނު ފުރަތަމަ ޑިވިޝަނުން ބާކީކުރިތާ 6 އަހަރުވ ވެފައިވާއިރު، ކުލަބު އޮތް ހާލަތުން ރަނގަޅު ޙާލަތަކަށް ބަދަލުކޮށް، ކުލަބު ފުރަތަމަ ޑިވިޝަނަށް ގެނެސް ކުލަބުގެ ކުރީގެ ފޯރިއާއި ޖޯޝު ގެނައުމަށް ކުލަބުގެ މިހާރުގެ މެނޭޖްމަންޓުންދަނީ ކެނޑިނޭޅި މަސައްކަތްތަކެއް ކުރަމުންނެވެ. ފުރަތަމަ ޑިވިޝަނަށް ނިއުރޭޑިއަންޓް ގެނެސް ނިއުރޭޑިއަންޓާ ވާދަވެރި އެހެން ކުލަބުތައް ކަމަށްވާ ވިކްޓްރީ އާއި ވެލެންސިއާ އާއެކު ވާދަވެރި ލީގެއް އުފެއްދުމަކީ ރާއްޖޭގެ ފުޓްބޯޅަ އަށް އަދި ޚާއްސަކޮށް ރާއްޖޭގެ ޤައުމީޓީމަށް މިކަމުގެ ސަބަބުން ބޮޑެތި ފައިދާތަކެއް ކުރުވާނެ ކަމެކެވެ.