މިދިޔަ މަހުގެ 18 ވަނަ ދުވަހު މާލޭގެ ގެއެއްގެ ފުރާޅު މައްޗަށް ޒުވާން އަންހެން ކުއްޖަކު ވެއްޓުނު ހާދިސާއާ ގުޅޭ މަޢުލޫމާތު ޙިއްސާ ކުރަން ބޭނުންވާ ފަރާތްތަކަށް އެ ފުރުޞަތު ފަހިކޮށްދިނުުމުގެ ގޮތުން އެކަމަށް ޙާއްޞަ ޕޯޓަލްއެއް ހުޅުވާލައިފިއެވެ.

ޔުމްނު ވެއްޓުނު މައްސަލަ ތަޙުޤީޤު ކުރުމަށް ރައީސުލުޖުމްހޫރިއްޔާ އުފެއްދެވި ޚާއްސަ ކޮމިޝަނުން  ޕޯޓަލް ހުޅުވާލަފައި ވަނީ މިއަދު އެވެ.

Ad by Hajj Corporation

އެ ކޮމިޝަނުން ބުނީ 18 އޭޕުރީލް 2025 ގައި މާލޭގައި ހިނގި ހާދިސާއާ ގުޅޭގޮތުން، އެއްވެސް މަޢުލޫމާތެއް، ފޮޓޯ/ވީޑިއޯ ނުވަތަ އެނޫންވެސް އެއްވެސް ލިޔުމެއް މި ކޮމިޝަނާ ޙިއްސާކުރަން ބޭނުންނަމަ ނުވަތަ މި ކޮމިޝަނުގެ މަސައްކަތާ ގުޅޭގޮތުން އެއްވެސް ސުވާލެއް ކުރަން ބޭނުންވާނަމަ މި ޕޯޓަލް މެދުވެރިކޮށް އެ ފުރުސަތު ހުޅުވާލާފައިވާ ކަމަށެވެ.

ކޮމިޝަނުގެ މަސައްކަތުގެ ތެރެއިން މިހާރު ކުރިއަށް ދަނީ ތަހުޤީޤާއި ގުޅޭ އެކި ފަރާތްތަކާއި ބައްދަލުކޮށް އިންޓަވިއުތައް ކުރިއަށް ގެންދިއުމުގެ މަސައްކަތެވެ.

އިންކުއަރީ ކޮމިޝަންގެ ރައީސް ޑރ މުޙައްމަދު މުނައްވަރު ވިދާޅުވީ، މި ޕޯޓަލް ތައްޔާރު ކޮށްފައިވަނީ ސުވާލުވެސް ކުރެވޭ ގޮތަށް ކަމަށާއި ތަޙުޤީޤު ކުރިއަށްދާ ގޮތުގެ އަދާހަމަވެސް މި ޕޯޓަލްގެ ތެރެއިން ލިބޭނެ އިންތިޒާމު ލިބޭނެ ކަމަށެވެ.

ޑރ މުނައްވަރު މީގެ ކުރިން ވިދާޅުވީ މި ހާދިސާގައި ޖިނާއީ ކުށެއް ކުރެވުނުކަމުގެ ތުހުމަތުގައި ކުރެވޭ ތަހުގީގަކަށް ވާތީ ބައެއް މައުލޫމާތުތައް ތަޙުޤީޤު ފުރިހަމަވުމުން ހާމަކުރެވޭ ކަހަލަ މައުލޫމާތު ހުރެދާނެ ކަމަށް ރިއާޔަތް ކުރުމަށް އެދިވަޑައިގަންނަވާ ކަމަށެވެ. އެފަދަ މައުލޫމާތެއް ނެތްނަމަ އެ ކޮމިޝަންގެ މަސައްކަތްތައް ހިނގަމުންދާ ގޮތާއި ކުރެވޭ މަސައްކަތްތައް ހާމަކުރަމުންދާނެ ކަމަށް ވިދާޅުވިއެވެ.

18 ވަނަ ދުވަހު ހިނގި މައްސަލައާ ގުޅިގެން ރިޔާސީ ކޮމިޝަނެއް ރައީސް އުފެއްދެވީ މިދިޔަ މަހުގެ 27 ވަނަ ދުވަހުއެވެ. އެ ކޮމިޝަނުގައި ޖުމްލަ ފަސް މެންބަރަކު ހިމެނިވަޑައިގަންނަވައެވެ.

މި ކޮމިޝަނަށް ވަނީ ފުޅާ ދާއިރާއެއްގައި ބާރުތަކާއި އިމްތިޔާޒުތައް ދެއްވާފައެވެ. މީގެ ތެރޭގައި ދައުލަތުގެ އެންމެހައި މުއައްސަސާތަކުގެ އެހީތެރިކަން ހޯދުމާއި، ބޭރުގެ ޚަބީރުންގެ އެހީތެރިކަން ހޯދުމާއި، ޤާނޫނު ތަންފީޛުކުރާ އިދާރާއެއްގެ ބާރު ބޭނުންކުރުން ހިމެނެއެވެ. އަދި ހާޒިރުކުރަންޖެހޭ ފަރާތްތައް ހާޒިރުކޮށް ސުވާލުކުރުމާއި، ބޭނުންވާ ލިޔެކިޔުންތަކާއި ހެކި ހޯދުމުގެ ބާރު ވެސް ކޮމިޝަނަށް ލިބިގެންވެއެވެ.

ޔުމްނު ވެއްޓުނީ ހ. ފެންޓޯނިއާގެއިން ހ. މިޓާޒްގޭގެ ފުރާޅު މައްޗަށެވެ. މި ހާދިސާއާ ގުޅިގެން، ޔުމްނުއާ އެކު އެންމެ ފަހުން އުޅުނު ކަމަށް ބެލެވޭ ގ. އެރިޔަދޫ، ރައުދު އަޙްމަދު ޒިލާލް ވަނީ ހައްޔަރުކޮށް، އޭނާގެ ބަންދު ފަސް ޖަހާފައެވެ. މީގެ އިތުރުން، ހާދިސާ ހިނގުމުގެ ކުރިން ޔުމްނުއާ އެކު އުޅުނު އިތުރު 8 މީހެއްގެ ފޯނު ހިފަހައްޓައި، އެ ފަރާތްތަކުގެ ރާއްޖެއިން ފުރުން ވަނީ މަނާކޮށްފައެވެ.