އިނގިރޭސި ޕްރިމިއަރ ލީގުގައި މެންޗެސްޓަރ ސިޓީ އާއި ރެލިގޭޓްވެފައި އޮތް ސައުތުހެމްޓަން ވާދަކުރި މެޗު ލަނޑެއް ނުޖެހި އެއްވަރުވެއްޖެއެވެ. ލީގުގެ ފުލުގައި އޮވެ، ޗެމްޕިއަންޝިޕަށް ރެލިގޭޓުވެފައިވާ ސައުތުހެމްޓަންގެ ދަނޑުގައި ކުޅުނު މި މެޗުން އެ ޓީމަށް ވަނީ އެއް ޕޮއިންޓް ހޯދާފައެވެ.

މި މެޗާ ހަމައަށް ސައުތުހެމްޓަންއަށް ލިބިފައިވާ 11 ޕޮއިންޓަކީ ޕްރިމިއަރ ލީގުގެ ތާރީޚުގައިވެސް އެ ޓީމަށް ލިބިފައިވާ އެންމެ ދަށް އަދަދުގެ ޕޮއިންޓެވެ. މި މެޗު އެއްވަރުވުމާއެކު އެ ޓީމުގެ ޕޮއިންޓް ވަނީ 12 އަށް އަރާފައެވެ.

Ad by Hajj Corporation

މެޗުގައި ސިޓީއަށް ގިނަ ފުރުސަތުތަކެއް ލިބުނު ނަމަވެސް، ޑިފެންސަށް އިސްކަންދީގެން ކުޅުނު ސައުތުހެމްޓަންގެ ގޯލަށް ލަނޑެއް ޖެހޭގޮތް ނުވިއެވެ. މުޅި މެޗުގައި ސިޓީން ވަނީ 25 ހަމަލާ އުފައްދާފައެވެ.

މި މެޗު އެއްވަރުވުމާއެކު 36 މެޗުން 65 ޕޮއިންޓް ހޯދާފައިވާ ސިޓީ އޮތީ ތާވަލުގެ ތިންވަނައިގައެވެ. މި މެޗުން މޮޅުވެވުނު ނަމަ، ދެވަނައިގައި އޮތް އާސެނަލްއާ ޕޮއިންޓުގެ ގޮތުން އެއްވަރުވުމުގެ ފުރުސަތު އޮތް ނަމަވެސް، މި ނަތީޖާއާއެކު ގަދަ ފަހެއްގެ ވާދަވެރިކަން ވަނީ އިތުރަށް ބޮޑުވެފައެވެ.

ފާހަގަކޮށްލެވޭ ކަމެއްގެ ގޮތުގައި، އަނިޔާގެ ސަބަބުން ކުޅުމާ ދުރުގައި ހުރި ސިޓީގެ ސްޓްރައިކަރު އާލިން ހާލަންޑް މި މެޗުގައި ވަނީ ބައިވެރިވެފައެވެ. ސައުތުހެމްޓަން ވަނީ މިދިޔަ އެޕްރީލް މަހު ޕްރިމިއަރ ލީގުން ރެލިގޭޓުވެ، އެ ޓީމުގެ ކޯޗު އިވާން ޖުރިޗް މަޤާމުން ވަކިކޮށްފައެވެ.