މި ސީޒަނުގެ ފްރެންޗް ލީގުގެ އެންމެ މޮޅު ކުޅުންތެރިޔާގެ މަގާމު ޕެރިސް ސެއިންޓް-ޖަރމޭން (ޕީއެސްޖީ)ގެ ފޯވާޑް އޮސްމާން ޑެމްބެލޭ ހޯދައިފިއެވެ. މި ސީޒަނުގައި ޑެމްބެލޭ ވަނީ ފްރެންޗް ލީގުގައި ކުޅުނު 28 މެޗުން 21 ލަނޑު ޖަހައި، ޕީއެސްޖީއަށް ލީގު ޗެމްޕިއަންކަން ހޯދައިދިނުމުގައި އިސް ދައުރެއް އަދާކޮށްފައެވެ.

ބާސެލޯނާއިން ޕީއެސްޖީއަށް ބަދަލުވުމަށްފަހު، މި ސީޒަނުގައި ޑެމްބެލޭ ވަނީ މުޅި ސީޒަނުގައި މިހާތަނަށް ކުޅުނު 46 މެޗުން 33 ލަނޑު ޖަހައި، ފްރެންޗް ކަޕް ހޯދުމުގެ އިތުރުން ޔުއެފާ ޗެމްޕިއަންސް ލީގުގެ ފައިނަލަށް ޓީމު ގެންގޮސްދީފައެވެ.

Ad by Hajj Corporation

ޕީއެސްޖީގެ ކޯޗު ލުއިސް އެންރީކޭ ވަނީ ޑެމްބެލޭގެ ކުޅުން ވަރަށް ބޮޑަށް ތަރައްގީވެފައިވާ ކަމަށް ފާހަގަކޮށްފައެވެ. އެންރީކޭ އަކީ މި ސީޒަނުގެ ފްރެންޗް ލީގުގެ އެންމެ މޮޅު ކޯޗުގެ މަގާމު ހޯދި ކޯޗެވެ. އަދި މި ސީޒަނުގެ އެންމެ މޮޅު ގޯލްކީޕަރުގެ މަގާމު ޕީއެސްޖީގެ އިޓަލީ ގޯލްކީޕަރު ޖިއަންލުއިޖީ ޑޮންނަރޫމާ ވަނީ ހޯދާފައެވެ.

ޑެމްބެލޭ ބުނެފައިވަނީ ފްރެންޗް ލީގާއި ފްރެންޗް ކަޕް ލިބުނު ނަމަވެސް، ޕީއެސްޖީގެ މައިގަނޑު އަމާޒަކީ ޗެމްޕިއަންސް ލީގު ކަމަށެވެ. އެގޮތުން ފައިނަލުގައި އިންޓަރ މިލާން ބަލިކުރުމަށް ޓީމުގެ ކުޅުންތެރިން ދަނީ ވަރަށް ފުރިހަމައަށް ތައްޔާރުވަމުން ކަމަށް އޭނާ ވަނީ ހާމަކޮށްފައެވެ.
ފްރާންސް ލީގުގެ މޮޅުކުޅުންތެރިޔާގެ މަޤާމް ހޯދި ޑެމްބެލޭ މިހާރު އޮތީ ބެލަންޑިއޯ ރޭހުގެ އެންމެ މަތީގައެވެ. އެގޮތުން ޗެންޕިއަންސް ލީގާއެކު 3 މުބާރާތް (ޓްރެބްލް) ކާމިޔާބުކުރުމުގެ ފުރުސަތު ޑެމްބެލޭއަށް ފަހިވެފައިވާއިރު، ކުރިޔަށް އޮތް ނޭޝަންސް ލީގާއި، ކުލަބް ވޯލްޑްކަޕްގައި އެދެވޭ ނަތީޖާތަކެއް ޑެމްބެލޭ އާއި އޭނާގެ ޓީމު ހޯދައިފިނަމަ، އޭނާއަށް މި ސީޒަނުގެ ދުނިޔޭގެ އެންމެ މޮޅުކުޅުންތެރިޔާގެ މަޤާމްލިބުމަކީ ވަރަށް ކައިރީގައިވާ ކަމެކެވެ.