ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ބާއްވާ ލީގު ކަޕް 2025 ގައި ފުރަތަމަ ޑިވިޝަނުގެ ޓީސީ ސްޕޯޓްސް ކުލަބުގެ މައްޗަށް 4-1 ގެ ތަފާތު ބޮޑު ނަތީޖާއަކުން ކުރިހޯދައި، ނިއު ރޭޑިއަންޓް ސްޕޯޓްސް ކުލަބުން މި މުބާރާތުގެ ފުރަތަމަ މޮޅު ހޯދައި، މުބާރާތުގައި ބައިވެރިވާ އެހެންޓީމުތަކަށް ވަރުގަދަ މެސެޖެއް ދީފިއެވެ.
މިމެޗަށް ނިކުތުމުގެ ކުރިން މެނޭޖްމަންޓާއި ކޯޗުވެސް ވަނީ މިމެޗު ކާމިޔާބުކުރުމުގެ ފުރިހަމަ އިތުބާރު އޮތްކަން ހާމަކޮށްފައެވެ.

Ad by Hajj Corporation

މެޗުފެށިގެން ނިއުރޭޑިއަންޓުން އައީ މޮޅަށް ކުޅެ ގިނަ ހަމަލާތަކެއް އުފައްދަމުންނެވެ. އެގޮތުން މެޗުގެ ފުރަތަމަ ހާފުގައި އެ ޓީމުގެ ފަހަތަށް ކުޅެމުން އަންނަ އުޒްބަކިސްތާނުގެ ޑިފެންޑަރު ފުރްކަޖޯން އަށް ލިބުނު ފުރުސަތު ފާހަގަކޮށްލެވެއެވެ.

މެޗުގެ ދެވަނަ ހާފު ފެށިގެން ދެވަނަ މިނެޓުގައި ނިއު ރޭޑިއަންޓަށް ލީޑު ނަގައިދިނީ ރަފީގު އަމީން އެވެ. މިހާތަނަށް މޮޅު ކުޅުމެއް ދައްކަމުން އަންނަ ރަފީގު ވަނީ މާޒިޔާއާ ދެކޮޅަށް ކުޅުނު މެޗުގައިވެސް ލަނޑެއް ޖަހާފައެވެ.

ނިއު ރޭޑިއަންޓުން ލީޑު ނެގުމާއެކު ޓީސީ ސްޕޯޓްސް ކުލަބުން ވަނީ އެ ޓީމުގެ ކުޅުން ރަނގަޅުކޮށް، 59 ވަނަ މިނެޓުގައި ޒަޔާން ނަސީރުގެ ލަނޑަކުން މެޗުގެ ނަތީޖާ އެއްވަރުކޮށްފައެވެ. ނަމަވެސް 67 ވަނަ މިނެޓުގައި މޫސާ ޔާމިން (ޔާންބެ) ގެ ލަނޑަކުން ނިއު ރޭޑިއަންޓުން އަލުން ލީޑު ނެގިއެވެ.

މެޗުގެ ފަހު ވަގުތުތަކުގައި ނިއު ރޭޑިއަންޓުގެ ހަމަލާތައް އިތުރުވެގެންދިޔައެވެ. އެގޮތުން ރަފީގު އަމީންގެ ދެވަނަ ލަނޑާއި އާދަމް ނާސިހުގެ ލަނޑާއެކު މެޗު ނިމުނުއިރު ނިއު ރޭޑިއަންޓުން ވަނީ 4-1 އިން މޮޅުވެފައެވެ.

މި މުބާރާތުގައި ޓީސީ ސްޕޯޓްސް ދެން ނުކުންނާނީ އަންނަ ހޮނިހިރު ދުވަހުގެ ހަވީރު 4:00 ގައި މަހިބަދޫ ސްޕޯޓްސް ކުލަބާ ދެކޮޅަށެވެ. އަދި ހަމަ އެރޭ 9:00 ގައި ނިއު ރޭޑިއަންޓް ނުކުންނާނީ އޮޑި ސްޕޯޓްސް ކުލަބާ ދެކޮޅަށެވެ.